Parlament Senatynyń depýtaty Aqylbek Kúrishbaev QR Prezidenti Qasym-Jomart Toqaevtyń «Egemen Qazaqstan» gazetinde jariialanǵan «Táýelsizdik bárinen qymbat» atty maqalasyna qatysty pikir bildirdi, dep habarlaidy "Ult aqparat".
«Álemde óziniń azattyǵy úshin ǵasyrlar boiy kúresin úzbei jalǵastyrǵan jáne túbinde qolyn jetkizgen ulttardyń biri - qazaqtar. Sondyqtan halqymyz úshin Táýelsizdik - kieli, qasterli uǵym! Biz onyń qadiri men kiesin túsingen elmiz. Tabaldyryǵymyzdan attaǵan biylǵy jyly - osy Táýelsiz el atanǵanymyzǵa 30 jyl tolady. Osy oraida QR Prezidenti Qasym-Jomart Toqaevtyń «Táýelsizdik bárinen qymbat» atty maqalasynda biylǵy jyldyń qaita jańǵyrǵan qazaq memlekettiginiń, ata-babalarymyz ańsaǵan azattyqtyń tuǵyry nyǵaia túskenin áigileitin mańyzdy beles ekendigine basa ekpin túsirilgen. Táýelsiz memleket retinde jahandyq kóshke ilesken jańa Qazaqstan irgetasynyń qalanýy, azattyǵymyzdy nyqtaý, keregemizdi keńeitý jáne mereili elge ainalýdyń ońai soqpaǵany bárimizge málim», - dedi senetor.
Onyń aitýynsha, Prezident atalǵan maqalasynda egemendiktiń otyz jyldyq ǵumyryna taldaý jasai kele, ony úsh onjyldyqqa bólip, eńsergen belesterimizdi, baǵyndyrǵan biikterimizdi, qol jetkizgen tabystarymyzdy tarqata baiandaǵan.
«Tarih tamyryna tereńdei boilasaq, osynaý saiyn dalada kóshpeliler órkenietin qalyptastyrǵan, kindik qany tamǵan týǵan jerin jáne erkindigin qasyq qandary qalǵansha qorǵaǵan ata-babalarymyz taǵdyrdyń talai tarshylyǵyn, qiyn-qystaý kezeńdi, náýbetti jyldardy ótkerdi. Onyń ber jaǵynda keńestik dáýirdiń zulmattaryn da bastan keshirdik. Biraq moiymadyq, tabandylyq tanyttyq. Órligimiz ben rýhtyń asqaqtyǵy ult retinde joiylyp ketýden saqtady. Osyny túisingen adamǵa kerektiniń bári atalǵan maqalada kórinis tapqan. Búginde bizdiń kórshi eldermen halyqaralyq zańdarǵa negizdelip, resmi bekitilgen shekaramyzǵa, tutastyǵymyzǵa kúmánmen, qyzǵanyshpen qarap, arandatýshylyqqa boi aldyryp júrgen shetel azamattarynyń áreketterine de Prezidentimiz maqalasynda ǵylymi negizdep toitarys bere bilgen. Ár qazaqtyń kókeiinde júrgen, elimizdiń ishki, syrtqy saiasatyna qatysty jahandyq suraqtarǵa jaýap bolatyndai máseleler qamtylǵan. Keleshekte ondai kórshi memlekettermen aradaǵy tatýlyqqa syna qaǵýshylyqqa jol bermes úshin, atqarylar igi isterge jol siltegen. Táýelsizdikti alý bar, biraq ony qorǵap qalý, baiandy etý, keleshek urpaqtyń qolyna amanattaý - mynadai myń qubylǵan, almaǵaiyp zamanda ońai emes. Sondyqtan da Prezidentimiz aitqandai «Táýelsizdik bárinen qymbat» degen sózi máńgilik uranymyzǵa ainalýy kerek!», - dedi Aqylbek Kúrishbaev.
.jpeg)