Foto: Aqorda
Aqorda rezidentsiiasynda AQSh elshisi Djýli Stafft pen Bolgariia elshisi Georgi Vodenskidiń Qazaqstan Prezidentine senim gramotalaryn tapsyrý rásimi ótti.
Memleket basshysy Bolgariia elshisi arqyly Prezident Rýmen Radevke sálemin joldap, onyń byltyr elimizge jasaǵan resmi sapary ekijaqty qarym-qatynasqa aitarlyqtai tyń serpin bergenin aitty.
– Sizdiń elińizben yntymaqtastyqty odan ári nyǵaitýǵa múddelimiz. Saiasi, sondai-aq ekonomikalyq baǵyttaǵy yqpaldastyq aiasyn keńeitý úshin qoldan kelgen múmkindiktiń bárin jasaimyz, – dedi Qazaqstan Prezidenti.
Qasym-Jomart Toqaev Djýli Stafftpen áńgimelesý barysynda AQSh-qa jasaǵan sapary tabysty ótkenin yqylaspen eske aldy.
– Prezident Donald Tramp myrzamen dostyq ráýishte mazmundy áńgime órbitip, kelissózder júrgizdik. Taiaýda biz telefon arqyly emen-jarqyn sóilesip, ekijaqty yntymaqtastyǵymyzǵa qatysty kóptegen máseleni talqyladyq. Meni jyl sońynda Qurama Shtattarda ótetin G20 sammitine qatysýǵa shaqyrǵany úshin alǵys aitamyn. Biz kóptegen saladaǵy strategiialyq seriktestigimizdi damytyp, nyǵaitýǵa kúsh salamyz, – dedi Memleket basshysy.
Qasym-Jomart Toqaev elshilerdi diplomatiialyq missiialarynyń resmi túrde bastalýymen quttyqtap, olardyń memleketteri basshylaryna izgi tilegin joldady.
