Tanymal ánshi, “Jigitter” tobynyń múshesi Baǵlan Ábdiraiymov óner adamdarynyń eńbegin baǵalaý qajettigin aityp, tegin án oryndaýdy suraityn tanystaryna renishin bildirdi, dep habarlaidy ult.kz.

Óner iesiniń aitýynsha, sońǵy ýaqytta shyǵarmashylyq jumysyna qaita belsendi kiriskennen beri túrli jiyndar men toilarda tegin án aityp berýin ótinetin tanystary kóbeigen.

Ánshi buǵan deiin dostary men jaqyndarynyń qýanyshyna talai ret aqysyz qatysyp, sahnada óner kórsetkenin jasyrmady. Alaida endi shyǵarmashylyq eńbeginiń laiyqty baǵalanǵanyn qalaidy.

Baǵlan Ábdiraiymov bir ándi jaryqqa shyǵarý úshin qomaqty qarjy jumsalatynyn aityp, kópshilik bile bermeitin shyǵyndardy túsindirdi.

“Bir ánniń ózine 500 myń teńge ketedi. Onyń halyqtyń kóńilinen shyǵatynyna eshkim kepildik bere almaidy. Kei ánshiniń shyqpai qalǵan 10-15 áni bolady. Eseptei berińiz, qansha million teńge shyǵyn. Al halyqtyń kóńilinen shyqqan ánge klip túsirip, beinebaianǵa adam jaldaisyń, rotatsiiaǵa aqsha ketedi. Bir ándi halyqqa jetkizý úshin 5 million teńgege deiin jumsalýy múmkin”, – dedi ánshi.

Osylaisha, óner iesi sahnadaǵy birneshe minýttyq ánniń artynda úlken eńbek pen qarjylyq shyǵyn jatqanyn jetkizdi. Onyń pikirinshe, ánshiniń ýaqytyn, shyǵarmashylyǵyn jáne eńbegin baǵalaý mańyzdy.

Baǵlan Ábdiraiymov kim?

Baǵlan Ábdiraiymov – qazaqstandyq ánshi, “Jigitter” tobynyń múshesi, qazaq estradasynyń tanymal ókilderiniń biri.

Ol kópshilikke “Jigitter” tobynyń quramynda óner kórsetý arqyly tanyldy. Ujym qazaq estradasynda ózindik orny bar mýzykalyq toptardyń birine ainaldy. Baǵlan Ábdiraiymov toptaǵy shyǵarmashylyǵymen qatar jeke ánshilik jolyn da damytyp keledi.

Ánshi ónerdegi qyzmetinen bólek, áleýmettik jelilerde otbasylyq ómiri, shyǵarmashylyq josparlary jáne qoǵamdaǵy túrli máseleler jóninde pikir bildirip turady.

Baǵlan Ábdiraiymov 1983 jyly Túrkistan oblysy Túlkibas aýdanynyń Aqsý-Jabaǵyly eldi mekeninde dúniege kelgen. Ol 2003 jyly Shymkent qalasynda qurylǵan “Jigitter” kvartetiniń alǵashqy músheleriniń biri. Top “Erke qyz” áni arqyly keńinen tanyldy.

Ánshiniń jeke shyǵarmashylyǵyndaǵy tanymal týyndylarynyń biri – “Baǵala” áni. Sonymen qatar ol kitap jazýmen de ainalysqan. 2020 jyly “Mádeniet salasynyń úzdigi” tósbelgisimen marapattalǵan.

2025 jyly 7 mamyrda Almatydaǵy Respýblika saraiynda alǵashqy jeke shyǵarmashylyq kontsertin ótkizýdi josparlaǵany habarlandy. Bul kesh onyń sahnadaǵy 22 jyldyq óner jolyna arnaldy.