Búgin Prezident Qasym-Jomart Toqaevtyń tóraǵalyǵymen Tótenshe jaǵdai jónindegi Memlekettik komissiianyń otyrysy ótti. Bul týraly QR prezidentiniń baspasóz hatshysy Berik Ýáli facebook-tegi paraqshasynda jazdy, dep habarlaidy "Ult aqparat".
Oǵan oblystar men respýblikalyq mańyzy bar qalalardyń ákimderi, sondai-aq, memlekettik organdar men quqyq qorǵaý qurylymdarynyń basshylary beinebailanys rejimi arqyly qatysty.
«15 sáýirde tótenshe jaǵdai rejimi týraly Jarlyǵymnyń merzimi aiaqtalady. Tótenshe jaǵdai rejimin, kem degende, sáýirdiń aiaǵyna deiin sozýǵa týra keletini qazirdiń ózinde túsinikti bolyp otyr. Biz koronavirýspen aýyrýdyń sharyqtaý shegin áli ótkizgen joqpyz. Indetke qatysty jaǵdaidy jeńildetýge bolmaidy. Osy sebepke bailanysty karantin rejimin elordada, Almaty men Shymkentte jáne tiisti oblystarda sáýirdiń aiaǵyna deiin sozýdy tapsyramyn. Munyń ońtaily sheshim emes ekenin túsinemin. Óitkeni halyq kóshege shyǵyp, qalypty turmysyn jalǵastyrǵysy keledi. Biraq karantin rejimin saqtaýdan, oqshaýlanýdan basqa jol joq. Bul otandyq jáne halyqaralyq virýsolog mamandardyń usynysy» - dep atap ótti Memleket basshysy óz sózinde.
