Foto: Akorda.kz
Prezident HHLA kompaniiasynyń basqarma tóraǵasy Angela Tittsratpen kezdesti, dep habarlaidy "Ult aqparat" Aqordanyń baspasóz qyzmetine silteme jasap.
HHLA (Hamburger Hafen und Logistik) kompaniiasynyń basshysymen kezdesý barysynda Qazaqstan men Germaniianyń kólik-logistika salasyndaǵy yntymaqtastyǵyn nyǵaitý perspektivalary talqylandy.
Memleket basshysy Germaniianyń kólik jáne logistika salasyn damytýda atalǵan kompaniianyń mańyzdy ról atqaratynyn aita kele, onyń elimizde filial ashý týraly sheshimin quptady.
Qasym-Jomart Toqaev bul salanyń Qazaqstan úshin strategiialyq mańyzy zor ekenin aitty. Óitkeni elimiz Eýraziiadaǵy basty tranzit toraby retinde óz pozitsiiasyn kúsheitýge nietti.
Áńgimelesý barysynda Qazaqstan qurǵaq jáne suiyq júkterdi tasymaldaýǵa arnalǵan jańa tankerler satyp alý, sondai-aq Kaspii teńizindegi Aqtaý jáne Quryq porttaryn jańǵyrtý úshin qarjy tartýǵa múddeli ekeni atap ótildi.
HHLA – jetekshi eýropalyq logistikalyq kompaniia. Kásiporyn Gambýrg, Odessa, Tallinn, Triest qalalaryndaǵy teńiz porty terminaldaryna, sondai-aq olarmen bailanystyrylǵan Ortalyq jáne Shyǵys Eýropadaǵy intermodaldyq toraptar jelisine ielik etedi.
