Foto: Aqorda
Prezident óz Joldaýynda Bir palataly Parlament qurý týraly oiymen bólisti. Sonymen qatar, ol úshin ýaqyt keregin de aitty, dep habarlaidy Ult.kz.
Memleket basshysynyń sózinshe, bul óte mańyzdy másele ekenin aita kele, ony asyǵys sheshýge bolmaitynyn atap ótti.
«Bul reforma azamattyq sektorda, sarapshylar ortasynda, sondai-aq árine, qazirge Parlamentke jan-jaqty talqylanýy qajet. Reformanyń mán-mańyzy aiyryqsha ekenin eskersek, ony talqylaýǵa bir jyl ýaqyt kerek dep oilaimyn. Sodan keiin iaǵni 2027 jyly jalpy ulttyq referendým ótkizýge bolar edi. Sodan soń Konstitýtsiiaǵa tiisti ózgeris engize alamyz. Memlekettiń taǵdyryn aiqyndaityn barlyq másele halyqtyń kelisimimen ǵana sheshiledi dep buǵan deiin birneshe ret aittym. Eger bir palataly Parlament qurý qajet dep ortaq sheshsek, ondai Parlamentti tek qana partiialyq tizim boiynsha sailaý jón dep sanaimyn», dedi Q.Toqaev.
Prezidenttiń sózinshe, bul álemde keńinen taraǵan parlamenttik rásim. Osylaisha Májilistiń qazirgi quramy barlyq rásimder aiaqtalǵansha óz isimen ainalysa beredi.
«Senat jalpy ulttyq referendýmnyń qorytyndysy shyǵyp, jalpy Parlament sailaýy ótkenge deiin qaltqysyz jumys isteidi. Al saiasi partiialardyń básekege, tartysqa daiyndalýǵa ýaqyty bolady», dedi Memleket basshysy.
Parlamenttik reforma týraly sózinde Májilis depýtaty, zańger Abzal Quspan bul máseleniń zańgerler arasynda kóp talqylanǵanyn aitty.
«Joldaýdaǵy eń basty másele Parlamenttik reforma ǵoi. Bul áńgime shynymen de zańgerlerdiń arasynda óte kóp aityldy. Sonyń ishinde ózim de barmyn. Osy joldaýǵa deiin de birneshe ret suqbat berdim. Sonda osy máseleniń, sonyń ishinde konstitýtsiialyq reformany jalǵasyn tabýy kerek dep udaiy aityp kele jatyrmyn. Bir jyl ýaqytymyz bar, bir palataly Parlamentti qurý máselesine qyzý daiyndyqqa kirisemiz dep oilaimyn», dedi depýtat Abzal Quspan.
Buǵan deiin, 2 qyrkúiekte depýtat Ermurat Bapi tilshilerge bergen suhbatynda "Taratý bolady, biraq ol 2027 jyldarǵa taman... Bálkim jiyrma jetiniń basynda, ne jiyrma jetinshi jyldardyń aiaǵynda Toqaev myrzanyń kadentsiiasy biter aldynda bolady. Oǵan deiin ázirshe bola qoimaidy", - degen bolatyn.
