Qazaqstannyń Syrtqy ister ministrligi Reseide júrgen jáne Ýkrainadaǵy soǵys aimaǵyna jiberilý qaýpine tap bolǵan qazaqstandyqtardy elge qaitarý boiynsha kelissóz júrgizip jatyr, dep habarlaidy ult.kz.
SIM-niń resmi ókili Janbolat Úsenovtiń aitýynsha, áleýmettik jelide kómek suraǵan azamattardyń ár ótinishi muqiiat tekseriledi. Tekserý aiaqtalǵan soń qazaqstandyqtardyń tizimi Resei tarapyna joldanady.
Buǵan deiin Reseide júrgen bir top qazaqstandyq beineúndeý jariialap, ózderin Resei Qorǵanys ministrligine qatysty qujattarǵa qol qoiýǵa májbúrlegenin jáne Ýkrainadaǵy soǵys aimaǵyna jiberilý qaýpi baryn aitqan.
5 qazanda jariialanǵan videoda er adam elshilik pen advokattardan kómek kútip otyrǵandaryn jetkizdi. Onyń sózinshe, bastapqyda topta shamamen 15 adam bolǵan, keiin olardyń sany on shaqtyǵa deiin azaiǵan.
SIM bul máselege qatysty Resei tarapymen túrli deńgeide bailanys jasap jatyr. Qazaqstannyń Reseidegi elshisiniń Resei SIM jáne Qorǵanys ministrligi basshylyǵymen kezdesýi josparlanǵan.
Ministrlik soǵys aimaǵynda júrgen qazaqstandyqtardyń týystaryn azamattardyń aty-jóni, týǵan kúni, boljamdy ornalasqan jeri jáne eńbek kelisimsharty týraly aqparatty tikelei SIM-ge nemese diplomatiialyq ókildikterge berýge shaqyrdy.
Jedel bailanys:
QR SIM Konsýldyq qyzmet departamenti: +7 (7172) 72-05-00**, **[Dks_ast@mfa.kz](mailto:Dks_ast@mfa.kz)
QR-dyń Reseidegi elshiligi: +7 (925) 897-71-14, [consul.moscow@mfa.kz](mailto:consul.moscow@mfa.kz)
Sondai-aq Astrahan, Qazan, Omby, Ekaterinbýrg jáne Sankt-Peterbýrg qalalaryndaǵy Qazaqstannyń bas konsýldyqtarynyń jedel jelileri jumys isteidi.
