Tanymal ánshi Ábdijappar Álqoja Astanada ótken ápkesi Roza Álqojanyń kontsertine tosynnan kelip, erekshe syi jasady, dep habarlaidy ult.kz.
Óner iesi buǵan deiin ápkesine mereitoilyq kontsertine qatysa almaitynyn aitqan. Alaida ol Roza Álqojaǵa bildirmesten kontsertke kelip, sahnaǵa kútpegen jerden shyqqan.
Ábdijappar Álqoja osy sáttiń videosyn áleýmettik jelidegi paraqshasynda jariialap, ápkesiniń áserli kóńil kúiin kópshilikpen bólisti.
"Tosynnan baryp, sahnaǵa turǵyzyp qoiyp, betine aityp-aityp tastaǵasyń ǵoi. Meni kelmeidi dep oilaǵan ǵoi ápkem. Roza Álqojanyń emotsiiasyna baǵa berińizder", – dep jazdy ánshi.
Inisin sahnadan kóremin dep kútpegen Roza Álqoja tosynsyiǵa erekshe áserlengen. Al Ábdijappar oqyrmandaryn ápkesiniń sol sáttegi kóńil kúiine baǵa berýge shaqyrǵan.
Roza Álqoja kim?
Roza Álqoja – qazaq estradasynyń tanymal ánshisi, aqyn ári kompozitor. Ol 1981 jylǵy 1 qazanda dúniege kelgen. Ánshiniń balalyq shaǵy Ózbekstandaǵy Amangeldi aýylynda ótken. Bala kezinen mýzyka men ádebietke qyzyǵyp, dombyra úiirmesine qatysqan. Mektepte oqyp júrgende óleń jazyp, alǵashqy ánderin shyǵara bastaǵan. Keiin ál-Farabi atyndaǵy Qazaq ulttyq ýniversitetiniń jýrnalistika fakýltetine oqýǵa túsken. Sondai-aq Qazaq memlekettik qyzdar pedagogikalyq ýniversitetiniń Óner jáne mádeniet fakýltetin támamdaǵan.
Joǵary oqý ornyn bitirgennen keiin "Aq jol – Qazaqstan" gazetiniń óner bóliminde jýrnalist bolyp eńbek etken. Ýaqyt óte shyǵarmashylyqqa den qoiyp, kásibi ánshilik joldy tańdaǵan. 2008 jyly "Men syiǵa tartqan oramal" atty alǵashqy mýzykalyq albomyn jaryqqa shyǵardy. Onyń "Jylatqanyń netkeniń", "Qara kúz", "Myna ómir ǵajap qandai" jáne "Júrek nazy" ánderi tyńdarman arasynda keńinen tanyldy. Roza Álqoja óz repertýaryndaǵy shyǵarmalarmen qatar basqa qazaqstandyq oryndaýshylarǵa da án jazǵan. Onyń shyǵarmashylyǵynda ulttyq áýen, mahabbat, otbasy qundylyqtary men adam sezimi keńinen kórinis tabady. Ánshi jýrnalist Aidyn Qabamen otbasyn quryp, bes bala tárbielep ósirgen. Onyń týǵan inisi Ábdijappar Álqoja da qazaq estradasynda tanylǵan ánshi.
Ábdijappar Álqoja kim?
Ábdijappar Álqoja – qazaq estradasynyń tanymal ánshisi, Roza Álqojanyń týǵan inisi. Ol 1992 jyly Ońtústik Qazaqstan oblysynda dúniege kelgen. Balalyq shaǵy Amangeldi aýylynda ótken. Óner iesi alty balaly otbasynyń kenjesi bolyp ósken. Anasy uzaq jyldar qazaq tili men ádebieti páninen sabaq bergen. Ábdijappar bala kezinen án aitýǵa qyzyǵyp, ónerge jaqyn bolǵan. Alǵash ret altynshy synypta oqyp júrgende ápkesi Roza Álqojanyń qoldaýymen Almatydaǵy Respýblika saraiynyń sahnasyna shyqqan. Keiin Júsipbek Elebekov atyndaǵy respýblikalyq estrada jáne tsirk kolledjinde akterlik sheberlik mamandyǵy boiynsha bilim alǵan.
Ánshi shyǵarmashylyq jolynyń qalyptasýyna ápkesi Roza Álqojanyń úlken yqpal etkenin birneshe suhbatynda aitqan. 2011 jyly ápkesiniń jeke kontsertinde óner kórsetip, kópshilikke tanyla bastady. Keiin jeke ánderin jazdyryp, shyǵarmashylyq keshter uiymdastyrǵan. 2014 jyly "Ana týraly jyr" atty án keshin ótkizip, "Joldanbaǵan hat" albomyn jaryqqa shyǵarǵan. Roza Álqojamen birge oryndaǵan "Ápke" áni de tyńdarman arasynda keńinen tanyldy. Onyń repertýarynda "Original", "Tátti arýlar", "Qumyra júrek" jáne "Unaidy" sekildi ánder bar. Ábdijappar Álqoja búginde jeke shyǵarmashylyǵyn jalǵastyryp, kontsertter men túrli mýzykalyq jobalarǵa qatysyp keledi.
