Polshada sońǵy bir aptada bilim berý mekemelerinde birneshe shabýyl tirkelip, adamdar qaza taýyp, jaraqat aldy. Sońǵy oqiǵa Varshava qalasynda bolǵan, dep habarlaidy ult.kz.
Varshavadaǵy eresekterge arnalǵan mektepte 21 jastaǵy stýdent qyz úsh áielge shabýyl jasaǵan. Saldarynan 17 jastaǵy eki qyz ben 24 jastaǵy áiel zardap shekti. Jaralanǵandardyń biri aýrýhanaǵa jetkizilse, qalǵan ekeýine meditsinalyq kómek kórsetilgen. Politsiia kúdiktini ustady. Qazir onyń mundai áreketke ne sebepti barǵany anyqtalyp jatyr.
Bul Polshada sońǵy kúnderi bolǵan alǵashqy jaǵdai emes. 7 qazanda Ostrolenka qalasyndaǵy kásiptik mektepte 19 jastaǵy oqýshy adamdarǵa shabýyl jasaǵan. Oqiǵa saldarynan toǵyz adam jaraqat aldy. Olardyń arasynda bes oqýshy men eki muǵalim bar.
Dál sol kúni Serpets qalasynda politsiia taǵy bir yqtimal shabýyldyń aldyn alǵan. Tekserý barysynda 17 jastaǵy jasóspirimnen eki pyshaq tabylǵan.
Al 8 qazanda Leshidýl-Noviny eldi mekenindegi mektepte jasóspirim qyzmetkerlerge pyshaqpen shabýyl jasaǵan. Sonyń saldarynan bir áiel kóz jumyp, taǵy eki adam jaraqat aldy.
Associated Press agenttiginiń málimetinshe, 10 qazanda Polsha politsiiasy qaýipsizdik sharalaryn kúsheitý aiasynda 76 adamdy ustaǵanyn habarlady. Sondai-aq el boiynsha 50 myńǵa jýyq mektep tekserilgen.
Quqyq qorǵaý organdary atalǵan oqiǵalardyń ózara bailanysty ekenin rastaityn dálelder tabylmaǵanyn málimdedi. Qazir shabýyldardyń sebepteri men mán-jaiy anyqtalyp jatyr.
