Prezidenttiń usynǵan jáne júzege asyrylǵan bastamalarynyń basym bóligi memleket pen qoǵam arasyndaǵy bailanys tetikterin jetildirýge negizdelgen. Búgin QR Prezidenti janyndaǵy QSZI direktorynyń orynbasary Sanat Kóshkimbaev osylai málim etti, dep habarlaidy QazAqparat.
«Saiasattanýda memleket pen qoǵam arasyndaǵy keri bailanys tetigi dep atalatyn túsinikke nazar aýdarǵym keledi. Iaǵni, usynylǵan ári iske asyrylǵan Prezident bastamalarynyń eleýli bóligi memleket pen qoǵam arasyndaǵy keri bailanys tetigin jetilderýge negizdelgen. Bul óz kezeginde barsha túrlený men ózgeristerdiń negizi bolyp tur. Atap aitqanda, beibit jiyndardy qiymdastyrý tártibin ózgertý, parlamenttik oppozitsiia institýtyn qurý, jergilikti ózin-ózi basqarýdy damytý kontseptsiiasy bar», - dedi sarapshy «Prezidenttik jańa saiasi reformalar paketi» taqyrybyndaǵy sarapshylyq talqylaý barysynda.
Onyń aitýynsha, Memleket basshysy saiasi partiialardyń Parlament Májilisine ótýi shegin tómendetýge qatysty mańyzdy bastamany kóterdi.
«Bizde bes partiia sailaýǵa qatysty. Ótken sailaý nátijesin eskere otyryp, 7 paiyzdyq meje olarǵa joǵary bolyp tur. Ózderińiz bilesizder, 5 paiyzdyq mejeni «Aýyl» partiiasy eńserdi», - dedi S. Kóshkimbaev.
Onyń paiymynsha, barlyq deńgeidegi sailaý biýlletenine «bárine qarsymyn» degen jazýdy engizý de mańyzdy.
«Bul óz kezeginde aýqymdy áleýmettik saýalnama ispettes. Osy oraida turǵyndardyń tikelei pikirin bilýge, barsha saiasi kúshterge baǵa erýge jol ashady», - dedi sarapshy.
«Meniń oiymsha, reformalardyń kezeń-kezeńmen ótýi – mańyzdy qadam. Bul qadamdar saiasi túrlenýdiń ózekti bóligi bolyp tur», - dedi Sanat Kóshkimbaev.
Aita keteiik, búgingi sarapshylyq talqylaýǵa saiasi partiialardyń, úkimettik emes uiymdardyń ókilderi, zańgerler, tanymal saiasattanýshylar qatysyp jatyr.
