QR Premer-Ministri Álihan Smaiylov Prezidenttiń keńesshisi Sýma Chakrabartimen jáne BAÁ-niń Qazaqstan Respýblikasyndaǵy tótenshe jáne ókiletti elshisi Muhammed Said Muhammed ál-Arikimen kezdesti.
Bul týraly Úkimettiń resmi saity habarlady.
S. Chakrabartimen QR Úkimetiniń 2022 jylǵa arnalǵan is-qimyl baǵdarlamasyn talqylai otyryp, usynylǵan reformalar Qazaqstannyń jańa ekonomikalyq saiasatynyń negizi bolyp tabylatyny aityldy.
Ázirlengen sharalar kesheni jol kartasynyń 3 negizgi baǵyty — ekonomikalyq reformalardyń strategiiasy men baǵdarlamalaryn jetildirý, memlekettik basqarý, kommýnikatsiia jáne brend boiynsha iske asyrylatyn bolady.
Sonymen qatar aýmaqtyq-keńistiktik damýdyń úsh qaǵidatyn qamtityn, 2025 jylǵa deiingi aýmaqtyq damý josparyn ázirleý taqyryby qozǵaldy.
«Kásipkerlik sýbektilerin memlekettik qoldaý sharalarymen qamtýdy arttyrý úshin óńirlik damý baǵdarlamalary engiziletin bolady. Úkimet óńdeý ónerkásibiniń eksportqa baǵdarlanǵan jáne importty almastyratyn jobalaryn qarjylandyrýdyń tiimdi tetigin ázirleidi», — dep atap ótti Álihan Smaiylov.
BAÁ-niń QR-daǵy tótenshe jáne ókiletti elshisi Muhammed Said Muhammed ál-Arikimen kezdesýde ekijaqty kelisimderdiń iske asyrylý barysy jáne investitsiialar tartý máselesi talqylandy.
2021 jyly elder arasyndaǵy taýar ainalymy $709 mln qurady. 2020 jyldyń qorytyndysy boiynsha ózara saýda kólemi $474,4 mln boldy.
«Biz Qazaqstan ekonomikasyna investitsiialardy ulǵaitý arqyly BAÁ-men ózara is-qimyldy ári qarai jandandyrýdy kózdep otyrmyz. Biz úshin «Astana» halyqaralyq qarjy ortalyǵynyń ámirliktiń iri qarjy institýttarymen, onyń ishinde «Abu Dhabi Global Market» qarjy ortalyǵymen belsendi ózara is-qimylyn jalǵastyrýy asa mańyzdy», — dedi kelissóz kezinde Á. Smaiylov.
Qorytyndylai kele, taraptar alda atqarylatyn jumystar týraly pikir almasyp, kún tártibindegi máselelerdi oryndaýdyń mańyzdylyǵyn atap kórsetti.
