Qazaqstan Respýblikasynyń Prezidenti Úkimetti QR Konstitýtsiiasynda kózdelgen tártippen qurady, dep habarlaidy "Ult aqparat".
Konstitýtsiianyń 65-babyna sáikes, respýblika Premer-Ministri taǵaiyndalǵannan keiingi on kún merzim ishinde Premer-Ministr Úkimettiń qurylymy men quramy týraly Respýblika Prezidentine usynys engizedi.
Sodan keiin Úkimet músheleri Qazaqstan halqy men Prezidentine ant beredi.
Eske sala ketsek, búgin Parlament Májilisiniń jalpy otyrysynda Úkimet basshysy laýazymyna Asqar Mamin taǵaiyndaldy.
Elbasy Nursultan Nazarbaev ta osyǵan deiin «Nur Otan» partiiasy fraktsiiasynyń otyrysynda Úkimet basshysynyń kandidatýrasyna pikir bildirip, Asqar Maminniń kandidatýrasyn qoldaǵan edi.
Sonymen birge, búgin QR Prezidenti Qasym-Jomart Toqaev 7-shi shaqyrylǵan Parlamenttiń 1-shi sessiiasyn ashty. Memleket basshysy quramy jańǵyrǵan jańa Májilistiń qyzmetke kirisýi elimiz úshin simvoldyq máni bar eki oqiǵamen tuspa-tus keletinin atap ótti. Ol – el Táýelsizdiginiń 30 jyldyq mereitoiy men qazirgi zamanǵy Qazaqstan parlamentarizminiń shirek ǵasyrlyq beleske jetkeni. Memleket basshysy osy tarihi kezeńde senim mandatyna ie bolǵan depýtattar halyq úmitin aqtap, Otanymyzǵa adal qyzmet etetinine senim bildirdi.
