15 qarashada Polsha shyǵysyna zymyran qulap, eki adam qaza boldy. Bul habar seisenbi kúni keshke Polsha aqparat quraldarynda jariialandy. Zymyran qulaǵanyn poliak úkimetiniń ókili Petr Miller rastady.
Oqiǵaǵa bailanysty eldiń Premer-ministri ulttyq qaýipsizdik jáne qorǵanys máseleleri boiynsha ministrler keńesi komitetiniń otyrysyn ótkizdi, dep jazady Azattyq.
Ýkrainamen shekaraǵa jaqyn jerge zymyran túskeni jóninde habar Resei Ýkrainany jappai raketalarmen atqylap jatqan kezde taraǵan. Amerikanyń joǵary laýazymdy tulǵasyna súiengen Associated Press agenttigi Resei raketalary poliak shekarasynan asyp ketip, aýyl sharýashylyǵy fermasyna túsken bolýy múmkin degen.
Polsha biligi men AQSh ókilderi raketanyń qai elge tiesili ekenin aitpady. Pentagon men AQSh memlekettik departamenti, NATO ókilderi oqiǵa jóninde aqparat jinaqtap jatqanyn málimdedi.
Petr Miller de Qaýipsizdik keńesi otyrysynyń nátijesi jóninde eshteńe aitpady. Tek Soltústikatlantikalyq odaqtyń 4-babyna sáikes keńes mehanizmi iske qosylýy múmkin ekenin joqqa shyǵarmady. Polshanyń birqatar áskeri bólimderi kúsheitilgen daiyndyq rejimine kóshken.
Polsha – NATO-ǵa múshe memleket. Odaqtyń 4-babyna sáikes, odaqqa múshe elderdiń birine qater tóngen shaqta odaq músheleri ózara keńes júrgizedi. Másele NATO elderiniń birine shabýyl jasalǵan shaqta ujymdyq qorǵanys jóninde aitylǵan 5-bap týraly bolyp otyrǵan joq.
"Radio Liýblinniń" habarlaýynsha, oqiǵa 15 qarashada jergilikti ýaqyt boiynsha saǵat 15:40-ta (Astana ýaqytymen saǵat 20:40-ta) bolǵan. Ol kezde Ýkrainanyń kóptegen aimaǵynda Reseidiń raketa shabýylyna bailanysty dabyl qaǵylǵan. Raketa shabýylynan týyndaǵan jarylys seisenbi kúni Ýkrainamen shekaradan bes shaqyrym jerdegi Polshanyń Pshevodýv aýylynda bolǵan.
Resei qorǵanys ministrligi oqiǵa ornynan túsirilgen sýretterde reseilik raketanyń bólshekteri joq ekenin aitty.
AQSh qorǵanys ministrligi reseilik raketa Polsha aýmaǵyna tústi degen aqparatty rastai almaitynyn málimdedi. Pentagon ókili Patrik Raider vedomstvoǵa ázirge baspasóz málimeti ǵana belgili ekenin, aqparat tekserilip jatqanyn aitty.
Seisenbi kúni keshke AQSh prezidenti Djo Baiden Polsha basshysy Andjei Dýdamen sóilesti. Dýda sonymen birge Ýkraina basshysy Vladimir Zelenskiimen de sóilesken.
