Oralda marihýana tutynǵan politsiia qyzmetkerine 173 myń teńge aiyppul salyndy. Meditsinalyq kýálandyrý kezinde onyń aǵzasynan esirtki zattarynyń izi anyqtalǵan. Keiin qyzmetker kinásin moiyndaǵan, dep habarlaidy ult.kz.
Batys Qazaqstan oblystyq sotynyń baspasóz qyzmetiniń málimetinshe, quqyq buzýshylyq Batys Qazaqstan oblysy politsiia departamentiniń jeke quram boiynsha inspektsiiasy ótkizgen profilaktikalyq is-shara barysynda anyqtalǵan.
Aidaýyl bólimshesinde qyzmet etetin politsiia starshinasy tyiym salynǵan zattardy tutyný deregine qatysty meditsinalyq kýálandyrýdan ótken. Tekserý nátijesinde onyń aǵzasynan kannabinoidtar tobyna jatatyn esirtki zattary anyqtalǵan.
«Meditsinalyq kýálandyrý nátijeleri boiynsha kannabinoidtar tobyna jatatyn esirtki zattaryn tutyný deregi anyqtaldy. Ákimshilik is materialdarynda qyzmetkerdiń marihýana paidalanǵanyn óz qolymen jazbasha túsiniktemede kórsetip, kinásin moiyndaǵany týraly málimet bar», – dep habarlady sot.
Sonymen qatar politsiia qyzmetkeri qaita meditsinalyq kýálandyrýdan ótpegen.
Sot ony esirtki zattaryn meditsinalyq emes maqsatta tutynǵany úshin kináli dep tanydy. Is-áreketi Ákimshilik quqyq buzýshylyq týraly kodekstiń 440-1-babynyń 1-bóligi boiynsha saralanyp, 173 myń teńge aiyppul salyndy.
Sot qaýlysy ázirge zańdy kúshine engen joq.
