Qazaqstannyń halyq ártisi Dimash Qudaibergen Túrki memleketteri uiymyna (TMU) múshe elder basshylary qatysqan kontsertte óner kórsetti, dep habarlaidy ult.kz.

Mádeni is-sharada «Túrki álemi» ansambli men Túrkiia Respýblikasy Prezidenttik simfoniialyq orkestri túrki memleketteriniń tańdaýly mýzykalyq shyǵarmalaryn oryndady.

Kontsert barysynda mártebeli meimandar túrki halyqtarynyń ulttyq bilerin tamashalady. Sondai-aq sahnaǵa Túrkiianyń tanymal ánshisi Kyrach pen Qazaqstannyń halyq ártisi Dimash Qudaibergen shyqty. 

Mádeni kesh túrki halyqtarynyń ortaq rýhani murasy men ónerin dáripteýge arnaldy.

Dimash Qudaibergen kim?

Dimash Qudaibergen — qazaqstandyq ánshi, kompozitor ári mýltiaspapshy. Ol 1994 jylǵy 24 mamyrda Aqtóbede dúniege kelgen. Ónerli otbasynda ósken ánshiniń ákesi Qanat Aitbaev pen anasy Svetlana Aitbaeva da — kásibi ánshiler.

Dimash 2015 jyly Vitebskide ótken «Slavian bazary» halyqaralyq baiqaýynda bas júldeni jeńip aldy. Al 2017 jyly Qytaidaǵy «Singer» jobasyna qatysyp, álemge keńinen tanyldy.

Ánshi keń daýys diapazonymen, kúrdeli vokaldyq shyǵarmalardy oryndaý sheberligimen erekshelenedi. Onyń repertýarynda qazaq tilindegi ándermen qatar, túrli tilde oryndalatyn týyndylar bar. Dimashtyń tanymal shyǵarmalarynyń qatarynda «Umytylmas kún», «Mahabbat ber maǵan» jáne «Samaltaý» ánderi atalady.