Qazaqstandyq ánshi Dimash Qudaibergen Túrkiia astanasy Ankarada uiymdastyrylǵan halyqaralyq kontsertke arnaiy qonaq retinde qatysyp, birneshe tilde án shyrqady. Óner iesi túrki jurtynyń aldynda óziniń tól týyndylarymen qatar álemge áigili shyǵarmalardy oryndady, dep habarlaidy ult.kz.
28 qazanda Ankarada Túrki memleketteri uiymynyń mádeni is-sharalary aiasynda "Grand Arena Concert" atty aýqymdy kontsert ótti. Túrkiia Respýblikasynyń qurylǵanyna 103 jyl tolýyna orai uiymdastyrylǵan keshte túrki elderiniń tanymal opera ánshileri men klassikalyq mýzyka oryndaýshylary bas qosty.
Merekelik keshke Qazaqstan men Qyrǵyzstannyń halyq ártisi, TÚRKSOI uiymynyń "Túrki áleminiń mádeniet elshisi" ordeniniń iegeri Dimash Qudaibergen arnaiy shaqyryldy.
Dimash qazaq jáne túrik tilderinde án shyrqady
Qazaqstandyq ánshi kontsert barysynda óziniń "Umytylmas kún" atty avtorlyq shyǵarmasyn qazaq tilinde oryndady. Sondai-aq aty ańyzǵa ainalǵan Queen tobynyń "The Show Must Go On" ánin Túrkiianyń Prezidenttik simfoniialyq orkestrimen birge shyrqady.
Budan bólek, Dimash túrkiialyq tanymal didjei Býrak Ietermen birlesip jazǵan "Weekend" týyndysyn kórermen nazaryna usyndy. Ánshi jýyrda jaryqqa shyqqan, túrik tilindegi alǵashqy avtorlyq áni "Yazgi"-ny da oryndady.
Kontsert boiy kórermender qazaqstandyq ónerpazǵa qoshemet kórsetip, onyń ár ánin jyly qabyldady. Dimash óz kezeginde jinalǵan qaýymǵa qazaq, aǵylshyn jáne túrik tilderinde alǵys aitty. Ol baýyrlas túrik halqynyń aldynda óner kórsetý ózi úshin úlken qýanysh ári maqtanysh ekenin jetkizdi.
Túrki elderiniń ónerpazdary bir sahnada bas qosty
Halyqaralyq keshte Túrkiianyń Prezidenttik simfoniialyq orkestri bas dirijer Djemi Djan Deliormannyń jetekshiligimen álemdik klassikalyq mýzykanyń tańdaýly týyndylaryn oryndady. Atap aitqanda, Nino Rotanyń "Parla più piano", Djýzeppe Verdidiń "Traviata" operasynan "Brindisi" jáne Latif Hamididiń "Bulbul" shyǵarmalary shyrqaldy.
Kontsertke Qazaqstan atynan opera ánshileri Zarina Altynbaeva men Saltanat Dáýlethanova da qatysty. Sondai-aq Túrkiiadan Murat Karahan men Beril Iórekli El, Túrikmenstannan Atadjan Berdiev, Qyrǵyzstannan Zaira Raimbekova, Ózbekstannan Ýmid Shavkat Ýgli jáne Ázerbaijannan Ramil Gasymov óner kórsetti.
Ankaradaǵy kontsert túrki halyqtarynyń mýzykalyq murasyn dáriptep, elder arasyndaǵy mádeni bailanysty nyǵaitýǵa baǵyttaldy.
Dimash Qudaibergen kim?
Dimash Qudaibergen – álemdik sahnada tanylǵan qazaqstandyq ánshi, kompozitor ári birneshe mýzykalyq aspapta oinaityn ónerpaz. Onyń tolyq aty-jóni – Dinmuhammed Qanatuly Qudaibergen, 1994 jyly 24 mamyrda Aqtóbe qalasynda dúniege kelgen. Ákesi Qanat Aitbaev pen anasy Svetlana Aitbaeva – Qazaqstannyń eńbek sińirgen mádeniet qairatkerleri.
Dimash eki jasynda alǵash sahnaǵa shyǵyp, alty jasynda "Ainalaiyn" respýblikalyq baiqaýynyń fortepiano atalymynda jeńiske jetken. Ol Aqtóbedegi Ahmet Jubanov atyndaǵy mýzyka kolledjinde bilim alyp, keiin Qazaq ulttyq óner ýniversitetinde estrada óneri mamandyǵyn meńgerdi.
2012 jyly "Jas qanat" respýblikalyq baiqaýynyń bas júldesin ielenip, 2013 jyly Qyrǵyzstandaǵy "Meikin Aziia" festivalinde jeńimpaz atandy. 2015 jyly Belarýs elinde uiymdastyrylǵan "Slavian bazary" halyqaralyq baiqaýynda Gran-pri jeńip aldy.
Al 2017 jyly Qytaidyń "Singer" mýzykalyq jobasyna qatysyp, ekinshi orynǵa ie boldy.
Ánshi Qytai, Frantsiia, AQSh, Ulybritaniia jáne basqa da memleketterde jeke kontsertter ótkizip, qazaq mýzykasyn halyqaralyq sahnada tanystyryp keledi.
Dimashtyń shyǵarmashylyq qorjynynda "Daididaý", "Mahabbat ber maǵan", "Stranger" sekildi týyndylar bar, al 2023 jyly oǵan Qazaqstannyń halyq ártisi ataǵy berildi.
