“Astanaǵa kóktem kesh keledi” filmi arqyly kórermenge tanylǵan aktrisa Arai Oraqbaeva shyǵarmashylyq jolynyń kútpegen jerden úzilýine ne sebep bolǵanyn aitty. Óner iesi turmysqa shyǵý josparynda bolmaǵanyn, alaida ózin erkinen tys alyp qashqannan keiin kino salasynan birneshe jylǵa qol úzip qalǵanyn jetkizdi, dep habarlaidy ult.kz.
2009 jyly jaryqqa shyqqan “Astanaǵa kóktem kesh keledi” melodramasy kórermenniń esinde qalǵan týyndylardyń biri. Filmde aýyldan arman qýyp elordaǵa oqýǵa kelgen Nazym esimdi boijetkenniń taǵdyry baiandalady. Ýniversitetke túse almaǵan ol Astanada qalyp, qurylys salasyna jumysqa ornalasady. Úlken qalanyń qiyndyǵyna tótep berýge tyrysqan jas qyz jeke ómirinde de túrli synaqqa tap bolady.
Atalǵan filmde basty keiipkerdi somdaǵan Arai Oraqbaeva sol kezeńde kópshiliktiń nazaryn aýdarǵanymen, keiin uzaq ýaqyt ekrannan kórinbei ketti.
Jýyrda “Köremiz show” baǵdarlamasyna qatysqan aktrisa ónerdegi úzilisine sebep bolǵan jeke ómirindegi oqiǵany baiandady.
“Eki kún kónbedim, úshinshi kúni qalyp qoidym”
Aktrisanyń aitýynsha, sol jyldary onyń shyǵarmashylyq mansaby qarqyndy damyp, birneshe mańyzdy jobaǵa qatysý múmkindigi týǵan. Alaida kútpegen jaǵdai bolashaq josparyn túbegeili ózgertken.
“Meni negizi alyp qashyp ketken. Turmysqa shyǵý meniń oiymda bolmaǵan edi. Óitkeni mende sol jyldary óte qarqyndy túsirilimder boldy. “Bolashaq” atty filmge túsip, Germaniiaǵa ketýim kerek bolǵan. Teatr aktrisasy bolmasam da, “Baqyt qusy” atty spektaklge basty rólge bekitken. Boiym uzyn bolǵannan keiin sahnada jaqsy kórinesiń degen edi. “Qazaqfilmniń” “Jeńis semseri” degen filminde basty rólderdiń birin oinap, qainap jatqan kezimde joldasym ruqsatsyz alyp qashyp ketti. Eki kún kónbedim, úshinshi kúni qalyp kettim. Sonymen meniń kino mansabym úzildi”, – dedi Arai Oraqbaeva.
Óner iesiniń sózinshe, ol kezde shetelde túsirilimge qatysyp, teatr sahnasynda da baǵyn synaýǵa múmkindik bolǵan. Biraq otbasylyq ómirge aiaq basqan soń shyǵarmashylyq josparlary keiinge shegerilgen.
Kinoǵa bes-alty jyl túspegen
Baǵdarlama júrgizýshisi aktrisadan ónerdegi úzilistiń qansha ýaqytqa sozylǵanyn surady. Arai Oraqbaeva kino salasynan shamamen bes-alty jyl qol úzip qalǵanyn aitty. Aktrisa bul kezeńde kásibi múmkindikterin tolyq paidalana almaǵanyn jasyrmady. Onyń aitýynsha, turmysqa shyǵýy shyǵarmashylyq jolyna aitarlyqtai áser etken.
Degenmen Arai Oraqbaeva ónerden birjola ketken joq. Qazir ol akterlik qyzmetine qaita oralyp, kino jobalaryna qatysyp, jańa rólder arqyly kórermenimen qaita qaýyshyp júr.
Arai Oraqbaeva kim?
Arai Oraqbaeva – qazaqstandyq kino jáne telehikaia aktrisasy, “Astanaǵa kóktem kesh keledi” filmi arqyly kópshilikke tanylǵan óner iesi. Ol balalyq shaǵyn Aiagóz qalasynda ótkizip, mektep kezinen túrli shyǵarmashylyq baiqaýlarǵa qatysqan.
2007 jyly “Aiagóz arýy” baiqaýynda jeńimpaz atanyp, keiin respýblikalyq sulýlyq saiystarynda baq synaǵan. Bastapqyda zańger bolýdy armandaǵanymen, keiin akterlik ónerge bet buryp, Temirbek Júrgenov atyndaǵy Qazaq ulttyq óner akademiiasynda bilim alǵan.
2009 jyly rejisser Erkin Raqyshevtiń “Astanaǵa kóktem kesh keledi” filminde Nazym esimdi boijetkenniń beinesin somdap, kórermen yqylasyna bólendi.
2011 jyly Baian Alagózova uiymdastyrǵan “Qazaq arýy” baiqaýyna qatysyp, úshinshi oryndy ielendi.
Aktrisa “Jeńis semseri”, “Bolashaq”, “Balalyq shaǵymnyń aspany”, “Tamyr” jáne “Zero.QARYZ” filmderine túsken.
Sondai-aq “Appaq kelin”, “Baqyttyń kilti”, “Qashqyn” jáne “Gaýhar” telehikaialarynda óner kórsetken.
Arai Oraqbaeva turmys qurǵannan keiin shyǵarmashylyq qyzmetinde birneshe jyl úzilis bolǵanyn, alaida keiin kino salasyna qaita oralǵanyn aitqan. Óner iesi eki balanyń anasy jáne akterlik jumysyn otbasylyq ómirimen qatar alyp júr.
