Astanada páter alyp-satý arqyly joǵary tabys tabýǵa ýáde bergen áiel 19 adamdy aldap, 155 mln teńgeden astam qarajatty iemdengen. Sot ony 6 jyl 6 aiǵa bas bostandyǵynan aiyrdy. Alaida tórt balanyń anasy bolǵandyqtan, jazany óteý eki jylǵa keiinge qaldyryldy, dep habarlaidy ult.kz.
Astana qalasynyń qylmystyq ister jónindegi aýdanaralyq sotynyń málimetinshe, áiel 2025 jyldyń mamyrynan 2026 jyldyń qańtaryna deiin Instagram áleýmettik jelisinde Almatydan naryqtaǵy baǵadan arzan páterler satyp alyp, jóndep, keiin qymbatqa satý arqyly paida tabýǵa bolatyny týraly aqparat taratqan.
Osylaisha ol investitsiia salýǵa nietti azamattardy tartqan. Áiel investorlarǵa olardyń atyna rásimdelgen taýarlyq kreditterdi tólep, salǵan qarajatynyń 5-10 paiyzy kóleminde ai saiyn bonýs berýge ýáde etken.
Bastapqyda ol ýádesinde turǵandai kórinip, bir investordan túsken aqshany ekinshisine tólem jasaýǵa paidalanǵan. Alaida keiin tólemder toqtap, salymshylar aldyndaǵy mindettemeler oryndalmaǵan. Nátijesinde 19 adamǵa keltirilgen shyǵyn 155 mln teńgeden asqan.
Sot otyrysynda aiyptalýshy kinásin ishinara moiyndaǵan. Ol páterlerdi qaita satýmen ainalysýdy josparlaǵanyn, biraq barlyq investormen esep aiyrysýǵa shamasy jetpegenin aitqan.
Al jábirlenýshiler qarajat bergenin jáne kredit rásimdegenin rastady. Olardyń aitýynsha, nesie boiynsha bereshek áli kúnge deiin ótelmegen. Sondyqtan olar sottan qatań jaza taǵaiyndap, keltirilgen shyǵyndy óndirip berýdi suraǵan.
Qylmystyq kodekstiń 190-baby 4-bóliginiń 2-tarmaǵyna sáikes, asa iri mólsherde jasalǵan alaiaqtyq úshin múlkin tárkileýmen birge 5 jyldan 10 jylǵa deiin bas bostandyǵynan aiyrý jazasy qarastyrylǵan.
Sot áieldiń buǵan deiin de osyǵan uqsas qylmystar úshin sottalǵanyn eskerdi. Sonymen qatar onyń asyraýynda tórt kámeletke tolmaǵan balasy bar ekeni jazany jeńildetetin mán-jai retinde tanyldy. Aýyrlatatyn mán-jailar anyqtalmaǵan.
Osy mán-jailardy, jábirlenýshilerdiń sanyn, ótelmegen shyǵyn kólemin jáne olardyń pikirin eskere otyryp, sot áieldi 6 jyl 6 aiǵa bas bostandyǵynan aiyrý týraly sheshim shyǵardy.
Alaida Qylmystyq kodekstiń 74-babynyń 1-bóligi negizinde tórt kámeletke tolmaǵan balasynyń bolýyna bailanysty jazany oryndaý eki jylǵa, iaǵni 2028 jylǵy 20 qazanǵa deiin keiinge qaldyryldy.
Jábirlenýshilerdiń azamattyq talaptary ishinara qanaǵattandyryldy. Úkim ázirge zańdy kúshine engen joq.
Aita keteiik, buǵan deiin Aqmola oblysynyń turǵyny joq páterdi satyp almaq bolyp, alaiaqqa 10 mln teńgesin bergen.
