Atyraý – Aqtóbe baǵytyndaǵy jolaýshylar poiyzynda jolaýshynyń qaitys bolýyna bailanysty «Jolaýshylar tasymaly» AQ resmi túsinikteme berdi, dep habarlaidy ult.kz.
Kompaniianyń málimetinshe, qaiǵyly oqiǵa 13 shilde kúni №691/692 Atyraý – Aqtóbe baǵytyndaǵy poiyzdyń Qandyaǵash – Aqtóbe ýchaskesinde bolǵan.
Poiyz bastyǵynyń raportyna sáikes, kóz jumǵan azamat poiyzǵa jol júrý biletinsiz otyrǵan. Ony vagondardyń biriniń jolserigi mingizgen. Jol ústinde jolaýshynyń jaǵdaiy kúrt nasharlap, ol qaitys bolǵan. Kompaniianyń aldyn ala deregine sáikes, ólimge gipertoniialyq kriz sebep bolýy múmkin.
«Jolaýshylar tasymaly» AQ jolaýshy otyrǵan vagonda aýa baptaý júiesi shtattyq rejimde jumys istegenin, temperatýralyq rejimniń qalypty bolǵanyn málimdedi. Atalǵan vagon 2023 jyly shyǵarylǵan.
Poiyz Aqtóbe stantsiiasyna jetkennen keiin marqumnyń máiiti ýákiletti organdarǵa tapsyryldy.
Oqiǵadan keiin «Jolaýshylar tasymaly» AQ-nyń «Batys» filialynda qyzmettik tergeý júrgizildi. Onyń qorytyndysy boiynsha eki jolserik pen poiyz bastyǵy jumystan bosatyldy. Sonymen qatar Aqtóbe teliminiń bastyǵy men óndiristik oqytý jónindegi nusqaýshyǵa qatań sógis jariialandy.
Kompaniia málimetinshe, «Batys» filialynyń basshylyq quramyna qatysty da eńbek shartyn buzýǵa deiingi qatań tártiptik sharalar qabyldanady.
Al Kóliktegi politsiia departamenti atalǵan fakti boiynsha qylmystyq is qozǵaǵanyn habarlady. Vedomstvonyń aldyn ala málimetine sáikes, marqumǵa qoiylǵan bastapqy diagnoz – eki jaqty pnevmoniia. Qazirgi ýaqytta oqiǵanyń barlyq mán-jaiy anyqtalyp jatyr.
