18-19 qarashada Qazaqstannyń Rýmyniiadaǵy tótenshe jáne ókiletti elshisi Nurbah Rústemov Dolj oblysyna jumys saparymen bardy. Sapar aiasynda qazaqstandyq diplomat oblys jáne Kraiova qalasynyń basshylyǵymen kezdesti, dep habarlaidy "Ult aqparat".
Elshiliktiń málimetinshe, Nurbah Rústemov Dolj oblysy jergilikti Keńesiniń Prezidenti Kosmin Vasilemen jáne prefekt Nikýshor Roshkamen kezdesýde óńirlik yntymaqtastyqty jandandyrýdyń jáne Qazaqstan óńirleriniń birimen baýyrlastyq bailanys ornatýdyń jańa joldaryn talqylaǵan.
Kelissóz barysynda saýda-ekonomikalyq jáne mádeni-gýmanitarlyq áriptestikti damytýǵa basty nazar aýdaryldy.
Sonymen qatar, Kraiova qalasynyń meri Liia Olgýts Vasileskýmen kezdesýde saýda, bilim jáne mádeniet salalaryndaǵy óńirlik yntymaqtastyqty damytý perspektivalary qarastyryldy.
Mihai Emineský atyndaǵy Halyqaralyq akademiia prezidenti Ioan Diakoneskýmen kezdesý barysynda qazaqstandyq diplomat rýmyn tarapynyń eki el arasyndaǵy mádeni yntymaqtastyqty nyǵaitý jónindegi bastamalaryn qoldaitynyn atap ótip, odan ári jemisti ózara is-qimylǵa senim bildirdi.
2021 jylǵa arnalǵan is-sharalar kestesi aiasynda «Abai-Mihai Emineský» halyqaralyq poeziia festivalin ótkizý, Nur-Sultanda Mihai Emineský biýstin ornatý, sondai-aq Qazaqstanda Mihai Emineský poemalaryn aýdarý jáne jariialaý josparlanyp otyr.
Jumys saparynyń mańyzdy pýnkti - saýda-ónerkásip palatasy men óńirlik biznes qoǵamdastyq (Ade Gas, Topges Proiect jáne basqa) ókilderiniń qatysýymen «Invest in Kazakhstan» dóńgelek ústelin ótkizý boldy.
Is-shara barysynda elshi perspektivalyq investitsiialyq jobalar men AHQO qyzmetin tanystyryp, Qazaqstan ekonomikasynyń basym sektorlary týraly habardar etti.
Sonymen qatar, ekijaqty saýda-ekonomikalyq bailanystardy nyǵaitý múmkindikterin jandandyrý jóninde pikir almasyldy.
Osylaisha, kásipkerlerdiń ekijaqty saparlaryn uiymdastyrý jáne 2021 jyly Qazaqstan-Rýmyniia biznes-forýmyn ótkizý jóninde ýaǵdalastyq jasaldy.
Sondai-aq, Kraiova qalasyndaǵy indýstrialdy parkin aralaý barysynda bas direktor Ionýts-Kosmin Pyrvýleský parktiń qyzmetimen tanystyryp, otandyq jáne sheteldik kompaniialaryna jasalǵan qolaily jumys jaǵdaiy týraly habarlady (qazirgi ýaqytta 48 kásiporyn tabysty jumys isteýde).
Óz kezeginde elshi osyndai indýstriialyq parkterdi qurýdyń jáne olardyń jumys isteýiniń qazaqstandyq tájiribesi týraly aityp berdi.
Aita keteiik, Dolj oblysy Rýmyniianyń Olteniia tarihi aimaǵynyń ońtústik-batysynda ornalasqan. Halyq sany - 750 myń adam.
Ekonomikanyń negizgi sektorlary - aýyl sharýashylyǵy, aýyr ónerkásip, toqyma, mehanikalyq bólshekter men jinaqtaýyshtardy daiyndaý jáne basqalar.
