Ulttyq banktiń basqarma tóraǵasy Ǵalymjan Pirmatov el aýmaǵyndaǵy Resei rýbliniń ainalymy týraly málimet berdi, dep habarlaidy QazAqparat.
BAQ ókilderi Ulttyq bank ótkizgen brifingte "Resei rýbliniń Qazaqstan aýmaǵyndaǵy ainalymyn retteý úshin shekteý qoiý múmkin be" degen saýal qoidy.
Pirmatov qazir jaǵdai baqylaýda ekenin, qajet bolsa Úkimetpen birlesip qajetti sheshim qabyldaýǵa bolatynyn aitty.
«Buǵan deiin Prezidenttiń Jarlyǵymen bizdiń eldiń aýmaǵynan shetel valiýtasymen aqsha shyǵarýǵa shekteý qoiylǵan. Ol Jarlyqtyń maqsaty – qarjy júiesiniń turaqtylyǵyn qamtamasyz etý jáne sanktsiia táýekelderin azaitý. Sáýirden bastap shildege deiin biz ekinshi deńgeili bankterdiń kassalarynda qolma-qol rýbldiń jinaqtalǵanyn baiqaǵan edik. Shilde-tamyzda biz jinaqtalǵan qolma-qol aqshanyń bárin syrtqa shyǵarýǵa múmkindik berdik. Esterińizde bolsa, ol 38,3 mlrd rýbl bolatyn», - degen Ulttyq bank basshysy qazir bank kassalarynda ol kezdegidei kóp rýbl joq ekenin málim etti.
«Búginde, bizdiń sońǵy málimetter boiynsha, ekinshi deńgeili bankterdiń kassasyndaǵy rýbl massasy shetin mólsherde emes. Biz ony kúndelikti baqylap otyrmyz. Qajet bolǵan jaǵdaida Ulttyq bank pen Úkimet qajetti sheshim qabyldaidy», - dedi Ǵalymjan Pirmatov.
