Foto: ashyq derekkóz
Qazaqstan Respýblikasynyń Qarjylyq monitoring agenttigi zańsyz oiyn biznesin uiymdastyrý deregi boiynsha eki shetel azamatyn izdeýge jariialady, dep habarlaidy Ult.kz.
Sottyń sanktsiiasymen atalǵan tulǵalarǵa qatysty syrttai «qamaýda ustaý» túrindegi bultartpaý sharasy qoldanyldy.
Izdeýge jariialanǵandar — 1970 jylǵy 27 maýsymda týǵan, AQSh azamaty Dmitry Drýjinsky jáne 1985 jylǵy 8 qarashada týǵan, Ýkraina azamaty Marina Levkovich (Ginzbýrg). Olar Qazaqstan Respýblikasynyń aýmaǵynda zańsyz oiyn biznesin uiymdastyrdy degen kúdikke ilingen.
Tergeý barysynda «PIN-UP» jáne «PINCO» brendterimen jumys istegen onlain-kazino qyzmetin shetelden basqarǵan adamdar toby anyqtalǵan. Atalǵan tulǵalar bailanysy bar kompaniialar jelisi arqyly zańsyz qyzmetti uiymdastyrǵan.
D.Drýjinsky men M.Levkovich koordinatorlyq fýnktsiialardy atqaryp, sybailastardy irikteýmen, tólem uiymdary men ekinshi deńgeili bankterdiń ókilderimen ózara árekettesýmen, sondai-aq aqsha qabyldaý jáne shyǵarý protsesterin qamtamasyz etken tólem infraqurylymyn qurýǵa qatysqan.
Zańsyz qyzmetti búrkemeleý maqsatynda «PIN-UP.KZ» brendimen býkmekerlik qyzmetti júzege asyrýǵa memlekettik litsenziia alǵan «Bonami» JShS qurylǵany belgili boldy. Sonymen qatar qarjylyq súiemeldeý úshin onlain-kazinonyń tólem agregatorlary qyzmetin atqarǵan «Gold Pay» JShS men «Cyber Pay» JShS (keiinnen — «Pinnacle Financial Solutions» JShS) sekildi tólem uiymdarynyń jelisi tirkelgen.
Onlain-kazino klientterinen túsken qarajat tranzittik shottarda jinaqtalyp, keiin elektrondyq aqsha operatsiialaryna litsenziiasy bar bailanysty kompaniialar arqyly kriptovaliýtaǵa aiyrbastalǵan.
Qarjylyq monitoring agenttigi izdeýde júrgen tulǵalardyń ornalasqan jeri týraly qandai da bir aqparat bolǵan jaǵdaida, quqyq qorǵaý organdaryna habarlaýǵa shaqyrdy.
