Bul pikirsaiystyń basqa pikirsaiystan jóni bólek.
Elimizdiń sailaý týraly zańyna sáikes, sailaýaldy pikirsaiys ótkizý mindetti emes. Degenmen, elimizdiń saiasi menedjmenti osynaý pikirsaiysty kún tártibine engizip, belgili bir dárejede ótkizdi. Osy qadam, biliktiń elimizde demokratiia, saiasi protsessterdi liberalizatsiia jasaýǵa múddeli ekendigin kórsetse kerek.
Sondyqtan, bul diskýssiia - elimizdiń saiasi mádenietin jańa sapaly beleske shyǵarýdyń alǵysharty.
Meniń birinshi túigenim, qazaq tili formaldy memlekettik til emes, shynaiy saiasi tilge ainalyp otyr. Iaǵni, ana tilimiz óziniń ásemdigi, áýendigi, yrǵaǵy, tereń túp tamyry arqasynda elimizdiń barsha halqynyń júreginen naqty jáne máńgige oryn tapty.
Bul úlken jeńis!
Al pikirsaiystyń ózine keletin bolsaq, elimizdiń jalpy kún tártibi áleýmettik órleý, rýhani kemeldený, ekonomikalyq ósim ekendigin kórsetti. Úmitkerler aýyl máselesine jiti mán bere otyryp, aýyldyń tynys-tirshiligi, aýyldy damytý, onyń infraqurylymyn jetildirýge kóp mán berdi. Óte durys. Aýyl men qazaq ajyramas uǵym, aýyl damysa, el órkendeidi.
Sonymen birge, demokratiia, qoǵamdyq protsesserdi ártaraptandyrý, memleket pen qoǵam arasyndaǵy qarym-qatynastyń tepe-teńdigin saqtaý máseleleri óte ózekti bolyp, ýshyǵyp turǵandyǵy anyq baiqalady.
Úmitkerler de, bilik te osy máseleni eskerse, saiasi júie evoliýtsiialyq jolmen damýyna barlyq múmkindik bar.
Ótken pikirsaiysty elimizdiń saiasi júiesin jetildirýge jasalǵan naqty qadam dep aita alamyz. Memlekettiń saiasi menedjmenti qoǵamdyq pýlsti anyq basyp, demokratiia standarttaryn birte-birte engizýge qulqy bar ekendigin kórsetti.
Árine, pikirsaiystyń "áttegen-ailary da" joq emes, qoǵamnyń bir bóligi úmitkerlerdiń ózderi debatqa kelýi kerek, debattyń formaty bólek bolýy kerek degen oi aitýda. Jetilýge shek joq. "Kósh júre túzeledi" bunyń barlyǵy bolashaqta eskeriledi dep oilaimyz. Sailaý naýqany áli aiaqtalǵan joq. Eger de, úmitkerlerdiń birazy óziniń oiyn aýditoriiaǵa qosymsha jetkizemin dese, olarǵa qoi deitin eshkim bolmaityndyǵy anyq...
Erlan Sairovtyń feisbýktaǵy jazbasynan
