Petropavlda er adam garajdar mańynan mina taýyp aldy, dep habarlaidy QazAqparat.
Soltústik Qazaqstan oblysy Politsiia departamenti baspasóz qyzmetiniń málimetinshe, Petropavl turǵyny minaǵa uqsas tot basqan kúmándi metaldy ótken senbi kúni keshke taman Jambyl kóshesindegi garajdar mańynan taýyp aldy. Jarylǵysh zat sol jerdegi aǵashtyń túbinde jatqan. Zeinetker bul týraly birden jaqyn mańdaǵy ýchaskelik politsiia pýnktine baryp habarlaǵan.
Oqiǵa ornyna tabylǵan zatty tekserý úshin SQO Politsiia departamentiniń qyzmetkerleri men shuǵyl qyzmetter jetti. Olar kelgenge deiin tóńirek qorshaýǵa alynyp, qaýipsizdik sharalary jasaldy. Mamandar syrtyna qarap, tabylǵan zattyń qatty korroziiaǵa ushyraǵan tankige qarsy mina bolýy múmkin ekenin topshylaǵan. Tiianaqty tekserý men zertteýden soń boljam rastalyp, jarǵyshtehnik-mamandar ony joiý úshin arnaiy kólikke salyp alyp ketti. Keiin politsiia qyzmetkerleri 6637 áskeri bóliminiń poligonynda jarylǵysh zatty joidy.
Jarǵyshtehnik-mamandardyń aitýynsha, tabylǵan zat – oqytýǵa arnalǵan mina. Qatty tot basqandyqtan jáne syrtqy tańbalary bolmaǵandyqtan, minanyń naqty qai jyly shyǵarylǵanyn anyqtaý múmkin emes.
Politseiler bul zattardyń syrtyn tot basyp, shirise de qaýpi joǵary ekenin eskertedi. Ishinde jarylǵysh zat bolýy múmkin. Bundai zattardy taýyp alǵan jaǵdaida birden ishki ister organdaryna habarlaý qajet. Politsiia qyzmetkerleri kelgenge deiin ony ornynan qozǵap, qolmen ustaýǵa bolmaidy.
