Petropavlda 13 jastaǵy qyzǵa qatysty seksýaldyq zorlyq-zombylyq jasaǵan 37 jastaǵy er adam men onyń 32 jastaǵy áieli sottaldy. Er adam ómir boiyna bas bostandyǵynan aiyrylsa, áieline 20 jyl jaza taǵaiyndaldy, dep habarlaidy ult.kz.
Sot materialdaryna sáikes, erli-zaiypty Petropavldaǵy Jumysshy kentinde turǵan. Er adam konditer, al áieli sanitar bolyp jumys istegen. Olardyń eki balasy bar.
Oqiǵa bolǵan kúni er adamnyń úiine týysy 13 jastaǵy tanys qyzymen birge qonaqqa kelgen. Keiin kámeletke tolmaǵan qyzǵa qatysty seksýaldyq zorlyq-zombylyq jasalǵan.
Oqiǵa týraly qyzdyń ata-anasy bilgennen keiin politsiiaǵa aryzdanǵan. Kámeletke tolmaǵan jábirlenýshige qatysty qylmystyq is boiynsha sot otyrystary jabyq rejimde ótti.
Sot er adamdy kámeletke tolmaǵanǵa qatysty seksýaldyq sipattaǵy zorlyq-zombylyq áreketterin jasaǵany úshin kináli dep tanyp, ómir boiyna bas bostandyǵynan aiyrý jazasyn taǵaiyndady. Ol jazasyn tótenshe qaýipsizdik mekemesinde óteidi.
Al onyń áieli qylmysqa járdemdeskeni úshin kináli dep tanylyp, 20 jylǵa bas bostandyǵynan aiyryldy. Ol jazasyn ortasha qaýipsizdik mekemesinde óteidi.
Sonymen qatar sot jábirlenýshi taraptyń talabyn qanaǵattandyryp, sottalǵandardy qyzǵa keltirilgen moraldyq ziian úshin 6 mln teńge tóleýge mindettedi. Buǵan qosa, sot saraptamalaryn júrgizýge jumsalǵan **3,6 mln teńge shyǵyndy** da sottalǵandar óteidi.
Sot olardyń eki balasyna qatysty da jeke qaýly shyǵaryp, olardyń ekeýin de qorǵanshylyq jáne qamqorshylyq organdaryna berýdi tapsyrdy.
Sot úkimi ázirge zańdy kúshine engen joq.
