Jaqyn kúnderi Esil ózeniniń deńgeii arnasynan asýy yqtimal. Petropavl qalasy men Soltústik Qazaqstan oblysyna qarasty Esil, Qyzyljar jáne Shal aqyn aýdandaryn sý basý qaýpi tónip tur, dep habarlaidy Baq.kz tilshisi.
Qaýipti aimaqtardyń turǵyndary basqa eldi mekenderge kóshirilip jatyr. Esil aýdanynyń Nikolaevka aýylynan 114, Jarǵaiyńnan 90 adam evakýatsiialandy. Qazir olar jaqyn mańdaǵy aýyldardyń mektepteri men týystarynyń úilerin panalap jatyr.
«Búkil otbasymyzben Órnek aýylyndaǵy inimniń úiindemiz. Maldardy aýyl janyndaǵy dóńge shyǵaryp jigitter kezektesip baǵyp otyr. Esil ózeniniń deńgeii birtindep kóterilip kele jatqany baiqalady. Qolymyzǵa tek qujattarymyzda ǵana alyp shyqtyq. Úilerdi qulyptap kettik. Janymyzdy shúberekke túiip otyrmyz», – deidi Jarǵaiyń aýylynyń turǵyny, zeinetker Barqyt Joldybaeva.
«Tótenshe jaǵdailar jónindegi departament qaýipsizdik sharalaryn qatań saqtaý qajettigin eskertedi. Sý kez kelgen ýaqytta joldy shaiyp ketýi múmkin. Turǵyndarǵa qaýipti aimaqtarǵa barmaýǵa keńes beremin. Bundai jaǵdaida ásirese balalardy qadaǵalaý kerek», – deidi Soltústik Qazaqstan oblysy Tótenshe jaǵdailar jónindegi departamenttiń baspasóz hatshysy Evgenii Jýravlev.
Esil aýdanyna qarasty Nikolaevka jáne Jarǵaiyń aýyldarynan 130 jylqy, 250 bas iri qara, 56 shoshqa men 288 qoi-eshki qaýipsiz jerge kóshirildi.
