Atyraý oblystyq perinataldyq ortalyǵynda birde-bir dáriger jumystan shyqqan joq. Perzenthana shtatty rejimde jumys istep tur, onyń tek bir bólimshesi ǵana jabylǵan. Bul týraly búgin Atyraý oblysynyń ákimi Nurlan Noǵaev aitty, dep habarlaidy Sputnik Qazaqstan.
"Perinataldyq ortalyq jabylǵan joq. Onyń tek bir qabaty ǵana sanitarlyq normalarǵa sáikes kelmegendikten jabyldy. Al sol jerdegi júkti áielderdi qalalyq aýrýhanalarǵa ornalastyrdyq", - dedi ákim búgin ortalyq kommýnikatsiialar qyzmetinde ótken brifingte.
Aitýynsha, perzenthanadaǵy aýa ainalym júiesi jóndeýden ótken.
"Qajetti saraptama aiaqtalǵan soń, júkti áielderdi qaitadan sol jerge aýystyramyz. Perinataldyq ortalyq jabylmaidy. Ol jumys istep jatyr", - dep sendirdi Noǵaev.
Tońazytqyshtan tabylǵan sábi ólimine qatysty is qozǵalǵannan keiin perzenthana dárigerleri jappai jumystan ketý týraly aryz jazǵan edi.
"Qazir tórt dáriger aryzyn keri qaitaryp aldy. 28 dárigermen túsindirý jumysyn júrgizýdemiz. Olarǵa kásibi maman retinde meditsinaǵa qoldaý kórsetip, jumysyn ári qarai jalǵastyrýy kerektigin aityp jatyrmyz. Qazir eshkim jumysynan shyqqan joq", - dedi oblys ákimi.
Tońazytqyshtaǵy bala ólimi
4 qazanda sybailas jemqorlyqqa qarsy is-qimyl agenttigi Atyraý oblystyq perinataldyq ortalyǵynyń jetekshisine jańa týǵan náresteniń ólimine qatysy bar degen aiyp taǵylǵanyn habarlady.
Perzenthanada sábi tiri týǵan. Alaida dárigerlerdiń salǵyrttyǵynan qujatta óli dep jazylady. Olar qateni túzetpeý úshin shaqalaqty tońazytqysh kamerasynda qaldyryp ketken.
Bul jaǵdai ortalyq jetekshisine qatysty basqa isti tekserý kezinde anyqtalǵan. Buǵan deiin meditsinalyq mekemeniń basshysy jemqorlyqqa bailanysty ustalǵany habarlanǵan edi.
Balanyń ólimine qatysty áieldi bosandyrǵan akýsher-ginekolog ta qamaýǵa alyndy.
Atyraý oblysynda shyqqan shýdan keiin densaýlyq saqtaý basqarmasynyń basshysy qyzmetinen ketip, ákimniń orynbasaryna qatań sógis berildi.
Perzenthanadaǵy sumdyqtan keiin psihologiialyq qysymǵa shydamaǵan dárigerler jumystan shyǵý týraly jappai aryz jaza bastady.
