QR Parlamenti Májilisiniń depýtaty Azat Perýashev Semeige respýblikalyq qala mártebesin berý máselesin kóterdi.
Osy oraida ol Úkimet basshysy Asqar Maminniń atyna depýtattyq saýal joldady, dep habarlaidy "Ult aqparat".
«Búgingi kúni Abai jeri Semei óńirinde birqatar sharalar qolǵa alyndy. Semei qalasy men aimaǵyn kóterýge buryn sońdy bolmaǵan qomaqty qarajat bólinip, gúldenýine kúsh jumsalýda. Árine, halyq ta Semei qalasynyń ósýine, órkendeýine qýanýda. Óitkeni Semei qalasynyń geografiialyq orny, ekonomikalyq deńgeii, saiasi murasy oǵan ábden laiyq», - dep toqtaldy depýtat.
A. Perýashev ótken jyly Elbasy Nursultan Nazarbaevtyń Jarlyǵymen ejelgi Túrkistan qalasy oblys ortalyǵyna ainalyp, al Shymkent shaharyna respýblikalyq dáreje berilgenin eske saldy. Bul tarihi sheshim Túrkistan aimaǵyn búkil túrki áleminiń ordasy retinde qaitadan nyǵaitýǵa jol ashty. Shymkent óz mártebesin túsirmei, elimizdiń betke ustar qalalarynyń biri retinde ary qarai damýda.
«Osy oraida ker zamanda qazaqtyń rýhyn kótergen, qazaqtyń daýysyn jetkizip, iisin tanytqan Abai rýhynyń ordasy - Semei qalasyna da tiisti mártebesin berý oryndy dep sanaimyz. Qurmetti Asqar Uzaqbaiuly, Ákimshilik-aýmaqtyq qurylys týraly Zańynyń úshinshi babyna sáikes, respýblikalyq mańyzy bar qalalar qataryna halqynyń sany 1 million adamnan asatyn eldi mekender nemese erekshe memlekettik mańyzy bar qalalar jatady. Bizdiń oiymyzsha, Semei qalasy dál osy erekshe memlekettik mańyzy bar qala. Sondyqtan oǵan respýblikalyq mártebe berý jóninde Memleket basshysyna usynys engizý múmkindigin qarastyrýyńyzdy suraimyz», - dedi Azat Perýashev.
