Pavlodar qalasynyń 27 jastaǵy turǵyny, jetim ósken Marina Harchýk Memleket basshysy Qasym-Jomart Toqaevqa beineúndeý joldap, áleýmettik baspana alý máselesin sheshýge kómektesýin surady, dep habarlaidy ult.kz.
Marinanyń aitýynsha, ol bala kezinen, iaǵni 2008 jyldan beri áleýmettik baspana kezeginde turǵan. 18 jyl kútkennen keiin oǵan 81 sharshy metr bolatyn eki bólmeli páter bólinetini týraly SMS-habarlama kelgen. Alaida kóp uzamai bul sheshimniń kúshi joiylǵan.
Oǵan baspana berýden bas tartýǵa otbasynyń tabysy belgilengen shekten asyp ketkeni sebep bolǵan.
Marina «Qamqor Vagon» kompaniiasynda alty jyldan beri jumys isteidi. Ai saiyn shamamen 300 myń teńge jalaqy alady. Joldasynyń da tabysy shamalas. Osylaisha otbasynyń jalpy ailyq kirisi shamamen 600 myń teńgeni quraidy.
Alaida áieldiń sózinshe, bul qarajat baspana jaldaý aqysyna, balabaqsha tólemine, azyq-túlikke jáne basqa da kúndelikti qajettilikterge jumsalady. Sondyqtan otbasynyń óz baspanasyn satyp alýǵa múmkindigi joq.
Marina memleket belgilegen tabys sheginiń otbasynyń naqty qarjylyq jaǵdaiyn tolyq kórsetpeitinin aityp, máselege nazar aýdarýdy surady.
Ol Memleket basshysynan áleýmettik baspana alý quqyǵyn qaita qaraýǵa jáne baspana máselesin sheshýge yqpal etýdi ótindi.
