kórneki sýret
Pavlodar qalasynyń turǵyny Gúlsim Aiapbergenova Ertis hokkei klýbynyń jattyqtyrýshysy 11 jastaǵy balasyn urǵanyn aitty. Oǵan balalardyń Aqtóbedegi matchta jeńilip qalýy sebep bolǵan. Áiel politsiiaǵa aryz jazǵan. Jattyqtyrýshyǵa aiyppul salynýy nemese 15 táýlikke deiin qamaýǵa alynýy múmkin, - dep habarlaidy Tengrinews.kz tilshisi.
"Balalarymyz almatylyq komandamen oinap, jeńilip qalǵannan keiin komanda jattyqtyrýshysy kiim aýystyratyn bólmede alǵashqy bes oiynshyny urǵan. Arasynda meniń ulym da bolǵan. Jattyqtyrýshy ishinen, birneshe ret iyǵynan urǵan", - dep jazdy zardap shekken oqýshynyń anasy Instagram-da.
Áieldiń aitýynsha, oqiǵa búkil komandanyń kóz aldynda bolǵan.
"Hokkei qatal sport ekenin túsinemin, biraq bul eshkimge balalardy urýǵa bolady degen quqyq bermeidi. Jattyqtyrýshy Pisegov V.I. balalardy únemi qorlaidy, balaǵattaidy, osylaisha, olardyń áli jetilmegen psihikasyna áser etedi. Onyń kógergen denesin kórgenshe, ulym uryp-soqqany týraly eshteńe aitqan joq. Jattyqtyrýshyǵa habarlastym, ol tipti sóilespedi. Qazir eshteńe bolmaǵandai jumysyn jalǵastyryp jatyr", - dep atap ótti Aiapbergenova.
Jazbaǵa pikir jazǵan keibir tárbielenýshilerdiń ata-anasy ony jattyqtyrýshyǵa jala japqysy keledi dep aiyptady.
"Balamnyń aitýynsha, uryp-soqpaǵan. Ata-analar, jattyqtyrýshylar men balalar qatysqan jinalys ótti. Balalardyń eshqaisysy jattyqtyrýshynyń bireýdi urǵanyn rastamady", - dedi jas hokkeishilerdiń biriniń anasy.
Sonymen qatar, Gúlsim Aiapbergenovadan basqa, komandanyń zardap shekken taǵy bir múshesiniń anasy jattyqtyrýshynyń ústinen politsiiaǵa shaǵymdanǵan.
"Kúieýim jankúier retinde matchqa bardy. Ol Nuráliniń jylap turǵanyn kórip, surai bastaǵan. Biraq bala úndemegen. Kúieýim jeńilip qalǵasyn jylap otyr dep oilaǵan. Nurálimen bolǵan oqiǵadan keiin ulymyzdan da surai bastadyq. Ol da alǵashqy bestikke kirgenin aitty, jattyqtyrýshy onyń iyǵynan úsh ret itergenin aitty. Qalǵan balalar úndemeidi", - dedi áiel.
Jattyqtyrýshynyń ózi oqýshylardy urmaǵanyn, ata-analardyń shaǵymdary jala ekenin aitty.
"Matchtan keiin balalarmen birge kiim aýystyratyn bólmege kirdik. Oiyndy, jeńilgenimizdi taldadyq. Balalarǵa qandai qatelikter jiberilgenin, qalai qorǵaný, qandai nársege nazar aýdarý keregin túsindirip, qolyn syndyryp almas úshin iyqty qalai ustaý keregin kórsettim. Bul - hokkei, jaraqat alý qaýpi bar sport túri. Biraq men eshkimdi tepken, urǵan joqpyn. Bul - jala, qastandyq. Bul komandany alty jyl boiy jattyqtyryp kelemin, osy ýaqyt ishinde Nurálidiń anasynyń únemi kóńili tolmaityn. Biraq balalarǵa eshqandai shaǵymym bolǵan joq, Nuráli komandadaǵy kóshbasshy jáne jaqsy nátijeler kórsetip júr", - dep túsindirdi Viacheslav Pisegov.
Týrizm jáne sportty damytý basqarmasynyń ókili sport mektebinde ata-analardyń shaǵymy boiynsha qyzmettik tekseris bastalǵanyn aitty. Al politseiler Gúlsim Aiapbergenovanyń ótinishinen keiin bapkerge qatysty ákimshilik is qozǵaǵan.
"Bul derek Pavlodar qalasynyń Ortalyq politsiia bóliminde tirkeldi. Sot-meditsinalyq saraptama nátijeleri boiynsha kámeletke tolmaǵan adamǵa keltirilgen dene jaraqattary jeńil jaraqat túrine jatady. Osy oqiǵa boiynsha QR ÁQBtK-niń 73-1-baby boiynsha ákimshilik is qozǵaldy, - dep túsindirdi Pavlodar oblysy politsiia departamentiniń baspasóz qyzmeti ókili.
Osy baptyń sanktsiiasy boiynsha 15 ailyq eseptik kórsetkishke aiyppul salynýy nemese 15 táýlikke deiin qamaýǵa alynýy múmkin.
