Foto: Tengrinews.kz/Turar Qazanǵapov
Pavlodarlyq dárigerler qatty soqqyǵa jyǵylǵan 47 jastaǵy áieldi aýrýhanaǵa jatqyzýdan eki ret bas tartqan. Dárigerler miy shaiqalǵan, qabyrǵasy kógergen jáne kóptegen jaraqattary bar jábirlenýshini ambýlatorlyq emdeýge jibergen, - dep habarlaidy Tengrinews.kz.
Dárigerlerdiń áreketine qatysty shaǵymdy "NeMolchi" qory Instagram-da jariialady. Qoǵam belsendileriniń málimetinshe, pavlodarlyq áieldi aralasqysy kelmegen beitanys er adam uryp-soqqan.
"Áiel júre almaidy, eshteńe kórmei qalǵan, qatty qusyp jatyr. Uryp-soǵý kezinde er adam ony aiamai tepkilegen. Soqqydan qýyq pen tik ishegi bosap qalǵan, qazir anýstan qan ketip jatyr, qabyrǵalary qatty kógergen. Jábirlenýshige dárigerler aýrýhanaǵa jatqyzýdan bas tartqany týraly qaǵaz berip, aýrýhanaǵa jatqyzýǵa negiz joq dep, úiden emdelýge jibergen", - dep jazdy qoǵam belsendileri.
Anyqtamada dárigerler aýrýhanaǵa kelgen áieldiń mas bolǵanyn jazady. Jábirlenýshi dárigerlerdiń meditsinalyq tekserýge jibermegenin jáne alkogolge qan almaǵanyn aitady. Soqqydan keiin bir kúnnen keiin áiel qaitadan jedel járdem shaqyrǵan.
"29 naýryz kúni keshke men qatty qusa bastadym. Meniń jaǵdaiymdy úige kelgen politsiia qyzmetkerleri kýálik jazyp berdi. Jedel járdem dárigerleri meni aýrýhanaǵa alyp ketti. Aýrýhanada ÝZI jasap, eshqandai aýrýyń joq dep qaitadan úige jiberdi", - deidi zardap shegýshi.
Áielge kómektesý úshin qoǵam belsendileri áleýmettik jeli arqyly Ishki ister ministrligi men Densaýlyq saqtaý ministrliginiń basshylaryna shyqqan.
Qazir jábirlenýshi úiinde. Alaida áieldiń jaǵdaiy aýyr. Pavlodar oblysynyń densaýlyq saqtaý basqarmasy aýrýhanaǵa jatqyzýǵa eshqandai belgiler joq dep sendiredi.
"Naýqas tekserilip, oǵan qajetti meditsinalyq kómek kórsetildi. Birqatar zertteýler júrgizildi, tirkelgen jeri boiynsha emhanada baqylaýǵa usynyldy. Ómirine qaýip joq", - dep jaýap berdi bólimshe.
Politseiler pavlodarlyq áieldi uryp-soǵý deregin tekserip jatyr.
"Atalmysh fakt Pavlodar qalalyq IIB-na tirkeldi. Tekserý júrip jatyr. Politsiia oqiǵaǵa qatysýshylardy anyqtady. Sot-meditsinalyq saraptama taǵaiyndaldy, onyń qorytyndysy boiynsha protsessýaldyq sheshim qabyldanady", - dep habarlady vedomstvonyń baspasóz qyzmeti.
