Pavlodarda órt sóndirý kóligi men mektep avtobýsy soqtyǵysqan jol apatyna bilim basqarmasy túsinik berdi, dep habarlaidy QazAqparat.
«Kýágerlerdiń aitýynsha, avtobýs júrgizýshisi jol erejesin buzbai, baǵdarshamnyń jasyl túsinde qozǵalǵan. Órt sóndirý mashinasy arnaiy dybystyq signalyn qospastan baǵdarshamnyń qyzyl túsine ótken», - dep málimdedi Pavlodar oblystyq bilim basqarmasynan.
Bilim basqarmasynyń málimetinshe, apat bolǵan kezde avtobýsta 15 oqýshy: №2 mekteptiń 10 oqýshysy, №43 mekteptiń 5 oqýshysy bolǵan. 8 oqýshy oblystyq balalar aýrýhanasyna meditsinalyq tekserý úshin jetkizilgen.
«Avtobýsta otyrǵan balalarǵa meditsinalyq kómek kórsetilip jatyr. Olardyń densaýlyǵyna esh qaýip tónip turǵan joq. 3 bala aýrýhanǵa jatqyzyldy, qalǵany úilerinde», - dedi basqarmadan.
Eske salaiyq, búgin saǵat 14:15-te Elgin men Shedrin kósheleriniń qiylysynda «KamAZ» markaly órt sóndirý kóligi «PAZ-32053-70» markaly mektep avtobýsymen soqtyǵysqan. Avtobýs turaqta turǵan «Volkswagen» jeńil avtokóligine soǵylǵan.
Keiinirek TJD Elgin kóshesi boiymen kele jatqan avtotsisternanyń kók nemese qyzyl tústi jarqyldaýyq maiagyn jáne arnaiy dybys signalyn iske qosqanyn atap ótti. Órt sóndirý kóligi baǵdarshamnyń qyzyl túsi janǵanda júrip kele jatqan. Shedrin kóshesindegi PAZ avtobýsy oǵan jol bermesten qozǵalysyn jalǵastyryp, órt sóndirý kóligin soqqan.
