Pavlodarda qyzdar ýlanǵan ortalyqtyń 4 qyzmetkeri jumysynan bosatyldy. Bul týraly onlain ótken baspasóz máslihatyna Pavlodar oblysy bilim berý basqarmasynyń basshysy Dinislam Bolathanuly málim etti, dep habarlaidy "Ult aqparat" Pavlodarnews.kz saityna silteme jasap.
«Ózderińizge belgili, 2 qańtarda Pavlodardaǵy qiyn jaǵdaiǵa tap bolǵan balalardy qoldaý ortalyǵynda qaiǵyly jaǵdai boldy. 3 qyz ýlanyp, bireýi kóz jumdy. Ol ata-anasynyń qamqorlyǵynsyz qalǵan qyz. Ata-anasy quqyǵynan aiyrylǵan. Qazir bul is boiynsha qylmystyq kodekstiń 371 babyna sáikes (adam ómirine qaýip tóndirgen salaqtyq), tergeý amaldary júrip jatyr», - dedi Dinislam Bolathanuly.
Basqarma basshysynyń aitýynsha, qazirgi ýaqytta atalǵan ortalyqtyń 1 medbikesi, 2 tárbieshiniń kómekshisi, kúzetshi jumysynan ketken. Ortalyq basshysy jumystan bosatý týraly ótinish bergen.
«Bul qyzmetkerler óz erikterimen jumystan bosatý týraly ótinish berdi. Ári qarai jumys istegileri kelmeidi», - dedi Dinislam Bolathanuly.
Ýlanǵan qyzdar Pavlodardaǵy oblystyq ómirlik qiyn jaǵdaiǵa tap bolǵan balalardy qoldaý ortalyǵyna ótken jyldyń qazan aiynda kelgen. Bir qyz ári qarai Shyǵys Qazaqstan oblysyndaǵy «deviantty minez-qulyqty balalarǵa arnalǵan oblystyq arnaiy mektep-internatyna» jiberilýi kerek bolǵan.
Aita keteiik, ótken jyly atalǵan ortalyqta bólmelerge beinebaqylaý kameralaryn ornatý boiynsha kópshilik arasynda daý týǵan bolatyn.
«Meniń jatyn bólmelerde beinebaqylaý kameralary bolǵan kezde bul jaǵdaidyń aldyn alý múmkin bolar ma edi degen jeke oiym bar. Alaida, bul másele ótken jyly rezonans týdyryp, sheshim boiynsha kameralardy alyp tastaǵanbyz. Biraq zań talabyna sai ortalyqtyń aýmaǵy, dálizder kórinip turatyndai kameralar bar», - dedi Dinislam Bolathanuly.
Sondai-aq basqarma basshysy qyzdardyń antiseptik iship ýlanǵanyna qatysty pikir bildirdi.
«Balalar antiseptik ishedi degen eshkimniń oiyna úsh uiyqtasa da kelmeidi. Alaida, antiseptik barlyq jerlerde qoljetimdi orynda turý kerek. Ol soǵan arnalǵan. Kirgen kezinde antseptikti qoldanyp, qaýipsizdigin qamtamasyz etýi tiis. Bul sabaq boldy», - dedi Dinislam Bolathanuly.
Pavlodar oblysynda ómirlik qiyn jaǵdaiǵa tap bolǵan balalardy qoldaýǵa arnalǵan 2 ortalyq bar. Ortalyqtarda 73 bala turady. Pavlodardaǵy ortalyqta – 29, Ekibastuzdaǵy ortalyqta – 44 bala bar. Ortalyqqa 3-18 jas aralyǵyndaǵy balalar keledi. Orta eseppen ár bala ortalyqta 3-6 ai aralyǵynda bolady. Oǵan qosa, ortalyqta turaqty bolatyn top bar. Ol topta 10 bala bar.
Eske salaiyq, 2 qańtar kúni saǵat 18:30-da oblystyq balalar aýrýhanasyna jedel járdemmen 2003 jyly týǵan qyz bala jetkizilgen. Ol oblystyq ómirlik qiyn jaǵdaiǵa tap bolǵan balalardy qoldaý ortalyǵynan es-tússiz kúide jetkizildi. Qyz bala belgisiz zattyń ýly áseri diagnozymen tústi. Bas miynyń isinýimen jansaqtaý bólimine jatqyzyldy. Intensivti terapiia bastaldy. Jasalǵan emdeý sharalaryna qaramastan saǵat 20:00-de júregi toqtady.
