Elordaǵa óziniń azamattyq nekedegi áieli men qyzyna qashyp kelgen 38 jastaǵy er adam Pavlodardyń tergeý izoliatoryna qamaldy, dep habarlaidy "Ult aqparat".
«Nur-Sultan qalasynda Shiderti kentindegi qaýipsizdigi barynsha tómen mekemede AP-162/10 koloniiasynda jazasyn óteýden jaltarǵan 38 jastaǵy sottalýshy ustaldy. Sottalǵan azamat 2019 jyldyń tamyz aiynda mekeme aýmaǵynan ketip, keshke koloniiaǵa oralmaǵan», - dep habarlady Pavlodar oblysynyń qylmystyq-atqarý júiesi departamentiniń baspasóz qyzmeti.
Vedomstvo bul mekemede sottalǵandardyń koloniia aýmaǵynda jumys isteýge quqyǵy bar ekenin eske saldy. Qashyp ketken azamat alaiaqtyq úshin jazasyn ótep jatqan. Ol sottalǵanǵa deiin elordada turǵan. Osy koloniiaǵa aýystyrylǵanǵa deiin Pavlodardyń ortasha qaýipsizdik mekemesinde jazasyn ótep jatqan bolatyn. 2019 jyldyń sáýirinde sot onyń mekemeni aýystyrý týraly ótinishin qanaǵattandyrǵan.
«QAJ jedel qyzmetkerleri sottalýshynyń ornalasqan jerin anyqtaý boiynsha jumysty Ekibastuz qalasy politsiia basqarmasynyń qyzmetkerlerimen birlesip júrgizdi. Bir jyldan astam ýaqyt boiy biz ustalǵan azamatty taba almaǵan edik. Qazir ol Pavlodar qalasynyń tergeý izoliatorynda qamaýda. Biz ony ortasha qaýipsizdik mekemesine qaitarý úshin sotqa material jiberemiz», - dedi AP-162/10 mekemesiniń basshysy.
Jaýap alý kezinde sottalýshy kinásin moiyndap, Nur-Sultan qalasyna otbasyna barǵanyn aitty. Elordada onyń azamattyq nekedegi jubaiy men qyzy turady.
Er adam jasyrynyp júrgen ýaqytta ártúrli mekenjailarda turǵan, túrli jumys istep kún kórgen.
Ekibastuz qalasynyń mańyndaǵy Shiderti kentiniń qaýipsizdigi barynsha tómen AP-162/10 mekemesinde 62 sottalýshy jazasyn ótep jatyr.
