© Pixabay / Klaus Hausmann
Qazaqstannyń eki oblysynda adamdy zańsyz bas bostandyǵynan aiyrý qylmysy anyqtaldy, dep habarlaidy Sputnik Qazaqstan.
Abai oblysynda politsiiaǵa kelgen áiel aǵasynyń joǵalyp ketkenin habarlaǵan. 50 jastaǵy er adamnyń psihikalyq aýytqýlary bar ekeni de belgili boldy. Uiymdasqan qylmysqa qarsy kúres basqarmasynyń mamandary birden izdeý sharalaryna kirisip, eki er adamdy ustady. Olar joǵalǵan Semei turǵynyn aldap, uialy telefonyn alyp qoiǵan. Keiinnen 200 shaqyrym jerdegi sharýa qojalyǵyna aparyp tastaǵan. Sol jerde jumysqa jekken. Osylaisha, zardap shekken er adamdy eki apta boiy ustaǵan.
Qazirgi kezde Qylmystyq kodekstiń 128-baby (Adam saýdasy) boiynsha sotqa deiingi tergeý amaldary bastaldy.
Pavlodar oblysynda da osyǵan uqsas qylmys anyqtaldy.
36 jastaǵy er adamdy beitanys bireýler qorqytyp, ormandaǵy ańshylar úiine aparyp tastaǵan. Sol jerde eki jyl boiy zańsyz jumysqa jekken. Zardap shekken er adam týǵan-týystaryna qaitaryldy. Qylmystyq is qozǵaldy.
Aita keteri, osy qylmys úshin 4 jyldan 7 jylǵa deiingi merzimge bas bostandyǵynan aiyrý jazasy qarastyrylǵan. Al adamdar tobymen aldyn ala sóz bailasýmen jasalǵan áreket úshin 7 jyldan 9 jylǵa deiin bas bostandyǵynan aiyrý jazasy bar. Kináli adamdardyń múlki tárkilinedi.
