Foto: Aqmola oblystyq politsiia departamenti
«Astana-Ereimentaý-Shiderti» avtojolynda «Mersedes» markaly shaǵyn avtobýstyń qatysýymen jol-kólik apaty boldy, dep habarlaidy Aqmola oblystyq politsiia departamentiniń baspasóz qyzmeti.
Aldyn ala boljam boiynsha, shaǵyn avtobýstyń júrgizýshisi jolda kele jatyp júk kóligin ozyp ótpekshi bolǵan ýaqytta aýdarylǵan.
— Avtobýs salonynda 14-16 jas aralyǵyndaǵy 16 bala jáne jattyqtyrýshy bolǵan. Olar jarysqa qatysý úshin Pavlodar qalasynan Astana qalasyna kele jatqan. Atalǵan derek boiynsha, qylmystyq is qozǵaldy, qajetti tergeý-tekserý sharalary júrgizilip jatyr, — dep habarlady Aqmola oblystyq politsiia departamentiniń baspasóz qyzmetinen.
Belgili bolǵandai, balalar jeke menshik sport mektebinde jattyqqan. Sport mektebiniń basshylyǵy óz shákirtterin jarysqa jibergen ýaqytta ol týraly politsiia qyzmetkerlerine eskertpegen. Sáikesinshe jolda patrýldik kólik avtobýspen birge júrmegen. Atalǵan derek boiynsha tekserý júrgizilip jatyr.
Eske sala keteiik, Qosshyda balalar mingen shaǵyn avtobýs apatqa ushyrady.
