- Búginde keibir astanalyqtar óz páterlerin, bolmasa, úidiń bólmelerin jalǵa berip otyrǵan azamattardy ýaqytsha tirkeýge alýǵa asyqpaidy. Sebebi odan keiin qosymsha salyq pen kommýnaldyq tólemderdi tóleýge týra keledi dep oilaidy. Osyǵan bailanysty bireýler páter jaldaityndarǵa óz týystarynyń úiine ýaqytsha tirkelýdi surasa, endi bireýler jalǵa berip otyrǵan bólmelerin múldem bosatýdy kózdeidi, dep xabarlaidy QazAqparat tilshisi.
«Iá, xalyq arasynda sondai bir sybys tarap júr. Páter jaldap otyrǵan azamattardy da ýaqytsha tirkeýge alsa, úidiń salyǵyn, tipti kommýnaldyq tólemderdiń mólsheri de ósedi deidi. Ózim naqtysyn bilmedim. Biraq jalǵa berip otyrǵan eki bólmem bar. Qazir úidegilermen aqyldasyp jatyrmyz. Bálkim, eki bólmeni de bosatyp, jalǵa berýdi múldem doǵaratyn shyǵarmyz. Biraq odan keiin ipotekanyń aqshasyn qalai shyǵaratynymyzdy bilmei otyrmyz», - deidi Dariia esimdi Astana qalasynyń turǵyny.
Eýraziia ulttyq ýniversitetiniń «pasport ústelinde» isteitin Maira Musabekova da keibir astanalyqtardyń páterdi jalǵa berip jatqan azamattardy ýaqytsha tirkeýge almai otyrǵanyn rastap otyr. «Búgin ǵana maǵan bir qyzmetkerimiz kelip ketti. Ózi jaldamaly úide turady. Iesi ýaqytsha tirkeýge alǵysy kelmei, jumys isteitin ýniversitetke baryp tirkelip kel depti», - deidi M.Musabekova.
Al elordada páter jaldap júrgen Azamat esimdi jas jigittiń aitýynsha, úidiń iesi odan týǵan-týystarynyń úiinde ýaqytsha tirkeýge turýdy ótingen.
.jpeg)