Men úshin elimizdiń eńseli erteńinen artyq arman da, qundylyq ta joq. Búgin «Nur Otan» partiiasynyń kezekten tys HH sezin qorytyndylaǵan QR Tuńǵysh Prezidenti - Elbasy Nursultan Nazarbaev osylai aitty, dep habarlaidy QazAqparat.
«Táýelsiz Qazaqstannyń irgetasyn qalaǵan, ony 30 jyl basqarǵan adam retinde aitarym, men úshin elimizdiń eńseli erteńinen artyq arman da, qundylyq ta joq. Osynaý kúrdeli kezeńde memlekettiń táýelsizdigin, tutastyǵyn saqtaý, barsha halqymyzdy Prezident tóńiregine toptaý - bárimizdiń paryzymyz, meniń paryzym, Elbasy retindegi missiiam. «Nur Otan» partiiasynyń, Qazaqstan halqy Assambleiasynyń, Dúniejúzilik qazaqtar qaýymdastyǵynyń jáne qaýipsizdik keńesiniń tóraǵasy retinde men osy jolda barymdy salamyn», - dedi Nursultan Nazarbaev.
Elbasy «Nur Otan» partiiasynyń kezinde eldi biriktirý, halyq pen bilik arasyna dáneker bolý úshin qurylǵanyn aitty.
«Búginde «Nur Otan» óz ýádesinde tura alatyn, eldegi myqty kóshbasshylardy toptastyrǵan saiasi uiym ekenin bári kórip otyr. Basqa partiialar da bolady, qazir de bar. Oǵan eshkimniń qarsylyǵy joq. Qoǵam solai, ýaqyt solai. Biraq sol partiialardyń barlyǵy naqty usynys berip, elge jaqsylyq jasasa eken deimiz. Tek synap, kóshege shyǵyp aiqailaǵannan ne shyǵady? Qansha aiqailasa da, kóshege shyqsa da kópbalaly analar, jaǵdaiy joq kisiler túbinde kimge keledi? Úkimetke keledi. Bárin sheshetin memleket, Úkimet. Sondyqtan daý-damaiǵa salmai, aiqai-shýsyz partiiaǵa kirip, odan soń depýtattyqqa ótip, sol jerde máselesin kóterip, sheshý kerek. Osy jolmen júreiik», - dedi QR Tuńǵysh Prezidenti.
