Parlament Májilisi «Ólim jazasynyń kúshin joiýǵa baǵyttalǵan Azamattyq jáne saiasi quqyqtar týraly halyqaralyq paktige ekinshi Fakýltativtik hattamany ratifikatsiialaý týraly» zań jobasy boiynsha talqylaýdy bastady, dep habarlaidy "Ult aqparat".
«Ólim jazasynyń kúshin joiýǵa baǵyttalǵan Azamattyq jáne saiasi quqyqtar týraly halyqaralyq paktiniń ekinshi Fakýltativtik hattamasyna Qazaqstan Respýblikasynyń eskertpesimen 2020 jylǵy 23 qyrkúiekte Niý-Iork qalasynda qol qoiylǵan bolatyn. Hattama elimizde ólim jazasyn joiý jónindegi halyqaralyq mindettemelerdi qabyldaýyna baǵyttalǵan. Májilistiń Halyqaralyq ister, qorǵanys jáne qaýipsizdik komiteti zań jobasy boiynsha 2021 jyldyń 23 maýsymǵa deiingi merzimde qorytyndy ázirleýge daiyn», - dedi depýtat Muhtar Erman Májilistiń jalpy otyrysynda.
Eske sala keteiik, 23 qyrkúiekte Birikken Ulttar Uiymynyń shtab-páterinde Qazaqstannyń BUU janyndaǵy Turaqty ókili Qairat Omarov ólim jazasyn joiýǵa baǵyttalǵan Azamattyq jáne saiasi quqyqtar týraly halyqaralyq paktige ekinshi Fakýltativtik hattamaǵa qol qoidy.
Keiinnen QR Syrtqy ister ministrliginiń baspasóz qyzmeti Qazaqstannyń atalmysh halyqaralyq paktige qosylýyna qatysty túsinikteme berdi.
«Qazaqstan Respýblikasynyń halyqaralyq sharttary týraly» 2005 jylǵy 30 mamyrdaǵy Qazaqstan Respýblikasy Zańynyń 11-babynyń 1) jáne 2) tarmaqtaryna sáikes ólim jazasyn joiýǵa baǵyttalǵan Azamattyq jáne saiasi quqyqtar týraly halyqaralyq paktige Fakýltativtik ekinshi hattamany QR Parlamenti mindetti túrde ratifikatsiialaýy tiis, óitkeni ol adamnyń jáne azamattyń quqyqtary jáne bostandyqtarymen bailanysty, sondai-aq Qazaqstan Respýblikasynyń zańdarynda kózdelgennen ózge erejelerdi belgileidi. Osylaisha, atalǵan halyqaralyq shart QR Parlamentimen ratifikatsiiadan ótkennen keiin ǵana kúshine enedi», - delingen habarlamada.
