Atalmysh qylmystyq is Qyzylorda qalasynyń №2 sotynda qaraldy. Onyń ústinen jábirlenýshi M. sybailas jemqorlyqqa qarsy is-qimyl ulttyq biýrosynyń Qyzylorda oblysy boiynsha departamentine aryzdanǵan, dep habarlaidy QazAqparat tilshisi.
Jábirlenýshiniń aitýynsha, ol óziniń basqarýyndaǵy avtokóligimen dosy ekeýi jeke sharýasymen «Atameken» saýda ortalyǵyna keledi. Ol Qyzylorda qalasyndaǵy Pýshkin kóshesimen bir baǵytqa júrýge arnalǵan jol talabynyń belgisin baiqamai qalǵan. Sol ýaqytta sońynan politsiia qyzmetiniń qyzmettik avtokóligi kelip, bir baǵytqa arnalǵan jolǵa kólikpen qarsy kelgenin eskertedi. Jol erejesin buzǵandyǵy úshin avtokóligine otyrǵyzyp alady.
Jasalǵan ákimshilik quqyq buzýshylyqty bir jyl ishinde qaitalap jasap turǵanyn nazarǵa salady. Bul úshin júrgizý kýáliginen aiyrý jazasy kózdelgenin aitýdy da umytpaidy. Jábirlenýshiden júrgizý kýáliginen aiyrmaý úshin 30 myń teńge talap etkenin emeýrinmen bildiredi. Degenmen kólik júrgizýshi M. atalǵan aqsha qarajatyna múmkinshiliginiń joqtyǵyna bailanysty 2 myń teńgeni politsiia qyzmetkeri B-nyń qolyna ustatady.
Atalmysh qarjyny mardymsyz kórgen politsiia qyzmetkeri odan bólek óziniń JSN nómerin berip, bank kartochkasy arqyly 7 myń teńge salýdy mindetteidi. Jábirlenýshiniń aryzy negizinde sottalýshy B-nyń is-áreketterine jasyryn tergeý áreketteri júrgizilgen. Onyń ústinen QR Qylmystyq kodeksiniń 366-babynyń 1-bóligimen is qozǵaldy.
Burynǵy tártip saqshysy qyzmetinen bosatylyp, politsiia leitenanty sheninen aiyryldy. Oǵan paranyń 50 eselengen somasy mólsherinde aiyppul taǵaiyndaldy. Aiyppuldyń jalpy kólemi 450 myń teńgeni quraidy.
