400 myń teńge para alyp, óz qateligin moiyndaǵan Nurjan Aqqul alǵashynda aiyppulmen qutyldy. Keiin is oblystyq sotta qaralyp, ol úsh jylǵa bas bostandyǵynan aiyryldy, dep habarlaidy QazAqparat.
Aqtóbe oblystyq sotynyń qylmystyq ister jónindegi sot alqasy oblystyq ekologiia departamentiniń burynǵy basshysy Nurjan Aqqulǵa qatysty isti qarady.
Buǵan deiin №2 Aqtóbe qalalyq soty Qylmystyq kodekstiń «Para alý» baby boiynsha Nurjan Aqquldy aiypty dep tanyp, 12 million teńge aiyppul salǵan bolatyn.
Sonymen birge memlekettik qyzmette jumys isteý quqyǵynan ómir boiyna aiyrdy.
«Sot alqasy qylmystyq istiń qoǵamda asa qaýipti ekenin eskerip, kásibi mamannyń óz antyn buzǵanyn negizge alyp, jazany kúsheitti. Sottalýshynyń jasy men buryn sottalmaǵany da eskerildi. Qazir ol 61 jasta. Ony 3 jylǵa bas bostandyǵynan aiyrdy. Ómir boiy memlekettik qyzmette, Ulttyq bank salasynda, kvazimemlekettik sektorda eńbek ete almaidy», - dep habarlaidy oblystyq sottyń baspasóz qyzmeti.
Sot úkimi zańdy kúshine endi.
