400 مىڭ تەڭگە پارا الىپ, ٶز قاتەلٸگٸن مويىنداعان نۇرجان اققۇل العاشىندا ايىپپۇلمەن قۇتىلدى. كەيٸن ٸس وبلىستىق سوتتا قارالىپ, ول ٷش جىلعا باس بوستاندىعىنان ايىرىلدى, دەپ حابارلايدى قازاقپارات.
اقتٶبە وبلىستىق سوتىنىڭ قىلمىستىق ٸستەر جٶنٸندەگٸ سوت القاسى وبلىستىق ەكولوگييا دەپارتامەنتٸنٸڭ بۇرىنعى باسشىسى نۇرجان اققۇلعا قاتىستى ٸستٸ قارادى.
بۇعان دەيٸن №2 اقتٶبە قالالىق سوتى قىلمىستىق كودەكستٸڭ «پارا الۋ» بابى بويىنشا نۇرجان اققۇلدى ايىپتى دەپ تانىپ, 12 ميلليون تەڭگە ايىپپۇل سالعان بولاتىن.
سونىمەن بٸرگە مەملەكەتتٸك قىزمەتتە جۇمىس ٸستەۋ قۇقىعىنان ٶمٸر بويىنا ايىردى.
«سوت القاسى قىلمىستىق ٸستٸڭ قوعامدا اسا قاۋٸپتٸ ەكەنٸن ەسكەرٸپ, كەسٸبي ماماننىڭ ٶز انتىن بۇزعانىن نەگٸزگە الىپ, جازانى كٷشەيتتٸ. سوتتالۋشىنىڭ جاسى مەن بۇرىن سوتتالماعانى دا ەسكەرٸلدٸ. قازٸر ول 61 جاستا. ونى 3 جىلعا باس بوستاندىعىنان ايىردى. ٶمٸر بويى مەملەكەتتٸك قىزمەتتە, ۇلتتىق بانك سالاسىندا, كۆازيمەملەكەتتٸك سەكتوردا ەڭبەك ەتە المايدى», - دەپ حابارلايدى وبلىستىق سوتتىڭ باسپاسٶز قىزمەتٸ.
سوت ٷكٸمٸ زاڭدى كٷشٸنە ەندٸ.
