Ózge etnos ókilderiniń balalaryn qazaq mektepterine berip jatqany qýantady. Bul týraly búgin Qazaqstan halqy Assambleiasy keńesiniń otyrysynda QR Tuńǵysh Prezidenti - Elbasy, QHA Tóraǵasy Nursultan Nazarbaev aitty, dep habarlaidy "Ult aqparat".
«Ózge barlyq ulttar men etnostardyń ókilderine bilim alý múmkindigi berilgen jáne olar ony qoldanyp ta júr. Burynyraqta memlekettik tilde sóleitin qazaq emes adamdy tabý problema bolatyn. Qazir bul múldem sirek kezdesetin jait emes. Elimizdegi barlyq etnostardyń arasynda memlekettik tildi jaqsy biletinder sanyn artyp kele jatyr. Memlekettik til jalpy moiyndalǵan azamattyq markerge ainaldy jáne kórshilerimiz de soǵan bara jatyr. Bul tek memleketti quraýshy ulttyń tiline degen qurmet qana emes. Óitkeni, til barlyǵyn biriktiredi», - dedi Elbasy.
QR Tuńǵysh Prezidenti Amerika júzdegen ult pen etnostan turatynyn, alaida olardyń aǵylshyn tili amerikalyq qylyp otyrǵandyǵyn basa aitty.
«Árine, bizde jaǵdai ózgesheleý. Biraq, soǵan barýymyz kerek jáne memlekettik til barlyq azamattarǵa basqarýdyń búkil organdaryna jumys isteýge, tipti Prezident bolyp sailanýǵa da múmkindik beredi. Sondyqtan maqsat úlken. Adam kóp til bilgen saiyn mádenietti bola túsedi. Menińshe, kópshilik muny ortaq maqsattar úshin jasap otyrǵanymyzdy túsinedi. Sol sebepti túrli etnostyń ata-analary balalaryn qazaq balbaqshalaryna, mektepterge jáne joǵary oqý oryndaryna bere bastaǵany qýantady. Muny qoldaý qajet», - dedi Nursultan Nazarbaev.
