Ózbekstannyń Namangan qalasynan tabylǵan Qoja Ahmet Iasaýidiń móri qazaqshaǵa aýdaryldy.
Bul týraly Túrkistandaǵy «Áziret Sultan» memlekettik tarihi-mádeni qoryq-mýzeiiniń mamandary málimdedi, dep habarlaidy "Ult aqparat".
Atalǵan mýzeidiń ǵylym bóliminiń basshysy Berik Baibolovtyń aitýynsha, aýdarma kezinde metalldan jasalǵan mórde tyń derekter jazylǵany anyqtalǵan.
Mamandardyń sózinshe, buǵan deiin tabylǵan Qoja Ahmet Iasaýidiń mórleri tek qaǵaz kúiinde saqtalǵan. Al, bul mór mystan jasalǵan. Ári alǵash ret tabylyp otyr. Shaǵatai tilinde jazylǵan jazbalar aýdarylyp, qai ǵasyrǵa tiesili ekeni de anyq bolǵan.
«Mundai mór jalpy aitqanda Orta Aziiada eshkimde kezdespeidi. Osy Ibrahim aqsaqaldyń qolynda qazir saqtalyp turǵan eken. Bizdiń túrkistandyq saqtalǵan mórlerde on Ahmettiń aty jazylady da, al keshegi qariianyń qolynan tabylǵan mórdi biz qazir aýdardyq. Onda bizge beimálim úsh sheihtyń aty belgili boldy. Ol Ahmet Ysqaq, Ahmet Jarjani, Ahmet Marjani degen. 14-15 ǵasyrǵa tiesili eken aidan anyq», - deidi Berik Baibolov.
Aita keteiik, buǵan deiin Ózbekstannyń Namangan qalasynan Qoja Ahmet Iasaýi shejiresiniń bir nusqasy men móri tabylǵan bolatyn. Islam álemine áigili shaiyqtardyń esimi jazylǵany qundy muralardy Iasaýidiń urpaǵy Ibrahimjan Sharifhýjaev qajy saqtap kelgen. 98 jastaǵy qariiany Túrkistandaǵy «Áziret Sultan» memlekettik taihi-mádeni qoryq-mýzeiiniń qyzmetkerleri Ózbekstanǵa arnaiy izdep bardy. Jasy bir ǵasyrǵa taiaǵan aqsaqal mýzei qyzmetkerlerine ata-babalarynan jetken Nasabnama qoljazbasyn da kórsetti. Shaǵatai tilinde jazylǵan eki jarym metrlik qoljazbany da mamandar sýretke túsirip alyp, aldaǵy ýaqytta zerttemek. Al, ǵulama ǵalym Ibrahimjan aqsaqaldyń qolyndaǵy Nasabnama shejiresi men mórin jaz maýsymyna taiaý Túrkistandaǵy murajaiǵa tabystamaq.
Jalpy, mýzei basshylyǵy Qoja Ahmet Iasaýidiń qaldyrǵan murasy áli kúnge tolyq zerttelip bitpegenin aitady. Ázirge tek 70-ten asa shejiresiniń túri tabylǵan. Sondyqtan «Iasaýi izimen» ǵylymi tanymdyq ekspeditsiia aiasynda áli de jumystar Orta Aziia elderi aýmaǵynda jalǵasady dep otyr.
