Ózbekstanda prezident sailaýy biyl qazan aiynda ótýi múmkin. Azattyqtyń Ózbek qyzmetiniń habarlaýynsha, sailaý merzimin ózgertý týraly usynys 25 qańtar kúni parlamenttiń tómengi palatasynyń otyrysynda talqylanǵan.
Qazirgi zańnamaǵa sáikes, prezident, zań shyǵarý organy, Qaraqalpaqstannyń joǵarǵy keńesi jáne oblys, qala, aýdandyq bilik tarmaqtaryna sailaý olardyń ókileti aiaqtalatyn jyldyń aiaǵynda – jeltoqsannyń sońynda ótýi tiis.
Al qazir sailaýdy jeltoqsannan qazan aiyna aýystyrý usynylyp otyr. Eger zań jobasy maquldansa, prezident sailaýy biyl 24 qazanda ótedi.
Shavkat Mirziiaev byltyr jeltoqsan aiynda 2021 jyly prezident sailaýyn halyqaralyq standartqa sáikes ótkizý kerek dep málimdegen. Elde sońǵy prezident sailaýy 2016 jyly 4 jeltoqsanda ótken.
2016 jyly Karimov dúnie salǵan soń bilikke kelgen Shavkat Mirziiaev birqatar reformalar júrgizýge ýáde etken. Karimov tusynda oqshaýlanyp qalǵan Ózbekstan Ortalyq Aziiadaǵy kórshi eldermen qatynasty jandandyrýǵa tyrysyp, batyspen de bailanysty jaqsartýǵa kúsh salǵan. Sarapshylardyń aitýynsha, ishki saiasat, qarjy, salyq, ekonomika jáne bilim salasynda da ózgerister baiqalǵan. Alaida Mirziiaev tusynda burynǵy kadrlar aitarlyqtai jańarmaǵan. Reformalardyń ózine ámirshildik sipat tán bolǵan.
