Ózbekstanda Jizaq oblysy Bahmal aýdanynyń 52 jastaǵy turǵyny V.K. prezident Shavkat Mirziiaevqa "til tigizdi" degen kúdikke ilindi. Oblystyq prokýratýranyń málimdemesinde er adamnyń Youtube pen Facebook-ta akkaýnt ashyp, videojazbalar jariialap, tikelei efirge shyqqany jazylǵan, dep habarlaidy Azattyq.
"Óziniń jazbalarynda ol qoǵamǵa prezident jetekshiligimen júrgizilip jatqan reformalardy qate túsindirgen, prezidentke til tigizip, memleket basshysynyń bedelin túsiretin aqparat taratqan, osylaisha qaralaǵan" delingen prokýratýra málimdemesinde.
Memlekettik qaýipsizdik qyzmetiniń Jizaq oblysy boiynsha basqarmasy Bahmal aýdany turǵynynyń ústinen Qylmystyq kodekstiń 158-bap 3-tarmaǵy boiynsha ("Ózbekstan prezidentine jariia túrde til tigizý nemese ony qaralaý") is qozǵaǵan.
Eger turǵynnyń kinási dáleldense, úsh jylǵa deiin qoǵamdyq jumysqa kesilýi múmkin nemese 2-5 jyl aralyǵynda bostandyǵy shektelýi nemese bas bostandyǵynan aiyrylýy múmkin.
Biyl naýryz aiynyń sońynda Ózbekstan Qylmystyq kodeksine prezidentke internette til tigizgenderdi nemese qaralaǵandardy jazalaityn túzetýler engizilgen. 30 naýryzda zańǵa prezident Shavkat Mirziiaev qol qoidy. Onyń aldynda qujatty parlamenttiń qos palatasy maquldaǵan.
