Foto ashyq derekkózden alyndy
Ózbekstan prezidenti Shavkat Mirziioev memlekettiń zaiyrlylyǵyn aiqyndaityn Qylmystyq kodeks pen Ákimshilik jaýapkershilik týraly kodekske engizilgen túzetýlerdi bekitetin zańǵa qol qoidy, dep habarlaidy Kazinform agenttigi.
Ádilet ministrliginiń málimetine sai, zańnamaǵa engizilgen túzetýler kóp áiel alýdy nasihattaý, AHAJ-da resmi neke qimai «nikoh» rásimin jasaý, genderlik kemsitý, sondai-aq qoǵamdyq orynda jeke basyn anyqtaýǵa múmkindik bolmaityndai dárejede jabyq kiim kigenderge qoldanylatyn jaýapkershilikterdi qamtidy.
«Eki jáne odan da kóp áielmen birge turýdy nasihattaý, osy turǵyda ideia nemese úndeý taratý, sondai-aq mundai áreketterdi qoldaý 15-ten 30 bazalyq eseptik shamaǵa (BESh) deiin nemese 4,950 millionnan 9,9 mln somaǵa deiin mólsherde aiyppul salý nemese 15 táýlikke deiin ákimshilik qamaýǵa alýmen jazalanady», - delingen Ózbekstan Ádilet ministrliginiń málimetinde.
Nekesi zańdy tirkelmegen adamdar arasynda, onyń ishinde neke jasyna tolmaǵandarmen otbasyn qurý boiynsha dini rásim jasaǵandarǵa 15-ten 30 bazalyq eseptik shamaǵa deiin aiyppul salynady.
Genderlik kemsitýdi nasihattaý, áielder men erlerdiń teń quqyǵyn ashyq túrde joqqa shyǵarý, osy baǵyttaǵy ideialar men úndeýlerdi taratý 10-nan 20 BESh-ke deiin nemese 3,3-6,6 million sým aiyppulmen jazalanady.
Budan basqa, jeke basyn anyqtaýǵa múmkindik bermeitindei búrkenip kiingen adamdardyń qoǵamdyq oryndarda bolǵany úshin jaza engizilip otyr. Osyndai áreket úshin 3,3 - 4,95 mln sým aralyǵynda aiyppul taǵaiyndalady.
Vedomstvodan atap ótkendei, tiisti ózgerister zań resmi jariialanǵan kúninen bastap kúshine enedi.
