Ózbekstan halqynyń sany 1 shildege deiingi esep boiynsha 32 million 345 myń adamǵa jetti. Gazeta.uz basylymynyń Ózbekstan memlekettik statistika komitetiniń aqparattyq qyzmetine silteme jasap habarlaýynsha, halyq sany 2016 jyldyń sońynan beri 224 myń adamǵa (0,7 paiyz) artqan. Qala halqy 16 million 353 myń (50,6 paiyz), aýyl halqy 15,9 million (49,4 paiyz) adam bolǵan.
2017 jyldyń alǵashqy alty aiynda 311,9 myń bala dúniege kelgen. 2016 jyldyń alǵashqy alty aiynda týǵan bala sany budan alty myńǵa az.
Qańtar-maýsym ailarynda 78,8 myń adam qaitys bolyp, 2016 jyldyń alǵashqy alty aiymen salystyrǵanda 4900 adamǵa artqan.
Qańtar-maýsym ailarynda Ózbekstanda 96,3 myń neke, 15,6 myń ajyrasý tirkelgen. Elde myń adamǵa shaqqanda alty neke, bir ajyrasýdan keledi. 2016 jyldyń qańtar-maýsym ailarynda myń adamǵa 5,9 neke, 0,9 ajyrasý tirkelgen edi.
Alǵashqy jarty jylda Ózbekstanǵa qonystanǵandar sany 82,5 myń, elden ketkenden sany 91 myń adamdy quraǵan.
