Ózbekstan densaýlyq saqtaý ministrligi el astanasy – Tashkenttegi vaktsinalaý pýnktterinde 65 jastan asqandarǵa jáne koronavirýs juqtyrý qaýpi joǵary oryndarda jumys isteitin meditsina qyzmetkerlerine vaktsina salý naýqany bastalǵanyn habarlady, dep jazady Azattyq.
Virýs juqtyrý qaýpi joǵary topqa koronavirýspen aýyrǵandardy emdeitin oryn, jedel járdem, infektsiialyq aýrýhana, koronaavirýs diagnozyn zertteitin zerthana, alǵashqy meditsinalyq-sanitarlyq qyzmet kórsetý orny siiaqty mekemelerdiń qyzmetkerleri jatady.
Buǵan qosa sozylmaly derti bar azamattarǵa, mektep jáne mektepke deiingi mekeme ókilderine, qarýly kúshter men quqyq qorǵaý organdary qyzmetkerlerine birinshi kezekte ekpe salynbaq.
Azamattarǵa AstraZeneca aǵylshyn-shved kompaniiasy men Oksford ýniversiteti birigip jasaǵan AstraZeneca (2 dozaly) jáne Ózbekstan men Qytai birlesip shyǵarǵan ZF-UZ-VAC2001 (3 dozaly) vaktsinalarynyń birin tańdaýǵa múmkindik beriledi. Ózbekstan densaýlyq saqtaý ministrliginiń habarlaýynsha, azamat vaktsinanyń tek bir túrin ǵana sońyna deiin ekkizýi kerek. Vaktsina salý erikti túrde júrgiziledi.
Ózbekstan úkimetiniń jospary boiynsha, sáýirde Tashkent pen Qaraqalpaqstan astanasy – Núkistegi jáne oblys ortalyqtaryndaǵy 219 vaktsinalaý ortalyǵynda 142,3 myń adamǵa koronavirýs ekpesi salynbaq.
El aýmaǵynda 3138 vaktsina egý pýnkti ashylǵan, 862 mobildi brigada jumys isteidi.
