Foto: Polisia.kz
Shymkentte uiymdasqan qylmysqa qarsy kúres basqarmasy zańsyz eńbekke tartty degen kúdikpen eki kirpish zaýytynyń qojaiynyn ustady, – dep habarlaidy Polisia.kz.
14 qazanda Almaty qalalyq PD-nyń “102” arnasyna Aqtóbe qalasynyń turǵynynan aryz tústi. Aryz berýshi Ózbekstan azamaty, aǵasy eńbek quldyǵynan qashyp qutylyp, óziniń janyna Almatyǵa kelgenin jetkizdi. Aitýynsha, buǵan deiin ony Shymkenttegi kirpish zaýytynyń qojaiyndary fizikalyq kúsh kórsetýmen qorqytyp, ustap kelgen. Alaida belgisiz bireýler qaitadan inisiniń izine túsip, qara tústi BMW kóligimen urlap ketipti.
"Qylmystyń aýyrlyǵyn eskere otyryp, Almaty jáne Shymkent qalalarynyń uiymdasqan qylmysqa qarsy kúres basqarmasynyń qyzmetkerleri birlesken arnaiy jedel is-sharalar júrgizilip, nátijesinde Shymkent qalasy men Túrkistan oblysynyń turǵyndary, úsh er adam ustaldy. Olar - kirpish zaýytynyń ieleri, ekeýi aǵaiyndy baýyr bolyp shyqty.
Tintý jumystaryn júrgizý kezinde jedel ýákilder eki zaýyttyń aýmaǵynan 60-tan astam sheteldikti tapty, olardyń barlyǵy kórshi Ózbekstannan kelgen.
Sotqa deiingi tergep-tekserý barysynda sheteldikter zaýytqa jumysqa shaqyrylǵany anyqtaldy. Sodan keiin, olardyń qujattaryn tartyp alyp, jalaqy berilmegeni jáne únemi fizikalyq zorlyq-zombylyq kórsetilip, korqytyp ustaǵany belgili boldy" - delingen habarlamada.
Búginde 25 sheteldik jumysshy “Sana-sezim” qoǵamdyq birlestiginiń qamqorlyǵynda bolsa, 30-dan astam azamat jeke basyn kýálandyratyn qujattarynyń bolmaýyna bailanysty qabyldap-taratý ortalyǵyna ornalastyrylǵan.
"Politsiiaǵa kúdiktilerge qatysty sheteldik azamattardan úsh resmi aryz tústi. Kúdiktiler qamaýda. Olardyń ústinen QR Qylmystyq kodeksiniń 126-baby (Eńbekke qanaý maqsatynda bas bostandyǵynan zańsyz aiyrý) jáne 389-baby (Ózinshe bilik etý) boiynsha sotqa deiingi tergeý amaldary júrgizilip jatyr. Saraptama taǵaiyndaldy" - delingen IIM baspasóz qyzmeti habarlamasynda.
